ქართველი მორაგბეები, საბა ილურიძე და რეზი ბროძელი რუსულ კლუბ სლავაში რჩებიან. როგორც რეზი ბროძელი ფეისბუქზე წერს, ქართული მხარე რუსულ მხარეს ესაუბრა და სიტუაცია გაირკვა.

"აქტიური მუშაობა დაიწყო გოჩამ [სვანიძემ] და საქართველოს რაგბის კავშირმა რუსეთის კავშირთან თუ რატომ უნდა მომხდარიყო ჩვენი გუნდიდან გაშვება, აღმოჩდა რომ ამის მიზეზი არაფერი არ იყო. ყველაფერი გაირკვა და დალაგდა! ჩვენი აზრით, ვიღაც მესამე პირები ინტრიგნულად ცდილობდნენ ჩემი და საბას ამ სოლიდარობის ჟესტის გაპოლიტიკურებას. აღსანიშნავია, რომ კლუბ სლავას ჩემი და საბას გაშვება არანაირად არ უნდოდა", — აღნიშნავს მორაგბე.

რამდენიმე დღის წინ ინფორმაცია გავრცელდა, რომ სოლიდარობის ჟესტის გამო ქართველ მორაგბეებს რუსული კლუბიდან რიცხავდნენ. მათ თამაშის დროს თვალზე ხელი აიფარეს, რაც საქართველოში განვითარებული მოვლენებისა და აქციების ერთგვარ სიმბოლოდ იქცა. როგორც საბა ილურიძემ On.ge-ს უთხრა, სწორედ ამ ჟესტის გამო გადაწყვიტა კლუბმა მათი გაშვება.