წინა კვირას პარიზის ცენტრი მანქანებისგან მთლიანად დაიცალა და ქუჩები ველოსიპედებმა და ქვეითებმა დაიკავეს. უკვე რამდენიმე წელია პარიზის ქუჩები მანქანებისგან ერთსა და იმავე დღეს ცარიელდება და ამას სოციალური კამპანიის სახე აქვს. პარიზელები ცდილობენ, თავიანთი დედაქალაქი ერთი დღით მაინც გახადონ უფრო სუფთა და წყნარი.

ამის პარალელურად კი გასულ ვიკენდზე პარიზი მსოფლიო ავტომოყვარულების მექად გადაიქცა - ამის მიზეზი პარიზის ავტოშოუ გახდა უამრავი სიურპრიზით, ტექნოლოგიური სიახლეებითა და უახლეს მოდელებთან მოპოზიორე ლამაზი გოგონებით.

წლევანდელი შოუ წინა ივენთებისგან იმითაც განსხვავდებოდა, რომ თუ ადრე აქცენტი საწვავზე მომუშავე ავტომობილებზე კეთდებოდა, წელს ყურადღების ცენტრში ჰიბრიდები და ელექტრომობილები მოექცნენ.

“არავინ იცის, როდის დადგება გარდამტეხი მომენტი ავტომობილების წარმოებაში, ამიტომ მთელი ინდუსტრია ნელ-ნელა ემზადება ამისთვის”, განაცხადა მერსედესის ალტერნატიული ენერგომატარებლების პროდუქტ-მენეჯერმა, მატიას იენსმა.

თვითონ ღონისძიება მეტნაკლებად სტანდარტული იყო: სუპერ-მანქანები ნელა ტრიალებდნენ პლატფორმებზე, კოქტეილის კაბებში გამოწყობილი გოგონები მორიდებულად იღიმებოდნენ ავტომობილების გვერდით პოზირებისას (რაც, ძალიან სექსისტურია, მთარგმნელის აზრით), განსაკუთრებულ სტუმრებს ოფიციანტები დასდევდნენ სასმელით და ა.შ.

ემისიის სკანდალის შემდეგ, ფოლკსვაგენი ყველანაირად ცდილობს სახელის გამოსწორებას და ამისათვის თავისი მთლიანად ელექტრონული კონცეპტ-ავტომობილი, I.D. წარმოადგინა, რომელიც, მათი აზრით, ცნობილი ხოჭოს სამართალმემკვიდრე უნდა გახდეს.

მერსედესმა დამსწრე აუდიტორიას თავისი ასევე ელექტრონული კონცეპტი - Generation EQ SUV უჩვენა, რომელსაც ერთ დამუხტვაზე 500 კმ-ს დაფარვა შეუძლია, რაც მთელი 100 კმ-ით მეტია ფრანგი მწარმოებლის, Renault-ის მიერ გამოფენილ Zoe EV-ზე (რომელიც, ასევე, ელ-მობილია).

“ეს ჩვენთვის გარდამტეხი მომენტია, რომელსაც დიდი ხანია ვგეგმავდით და გვიხარია როდესაც ვხედავთ, რომ ჩვენი კოლეგებიც მსგავს გრძელვადიან სტრატეგიას მიყვებიან” - განაცხადა Renault-ის პრეს-სპიკერმა, Céline Farissier-მა

ყველაფერი იმაზე მიუთითებს, რომ პარიზს და სხვა ქალაქებსაც ბევრად სუფთა და გამონაბოლქვით ნაკლებად დაბინძურებული მომავალი აქვს. Porte de Versailles-ში შეკრებილი ავტომწარმოებლები აცხადებენ, რომ ამისთვის ისინიც მზად არიან.

“დარწმუნებული ვარ, რომ ელექტრო მანქანები მომავლის ერთადერთი ალტერნატივაა. ახლა მთავარი კითხვა ისღა დარჩა, თუ როდის დადგება ეს მომენტი” - განაცხადა მატიას იენსმა.

Mercedes-Benz GQ კონცეპტი

ახალი Land Rover Discovery

Mercedes-Benz GLC 350 ჰიბრიდი

Mercedes-Maybach 6

VW IQ ელექტრომობილი

VW Budd მიკროავტობუსის კონცეპტი

BMW i3 კონცეპტი

ახალი პრიუსი

Toyota FCV Plus

საწვავზე მომუშავე ავტომობილები უკვე ძალიან დიდი ხანია მსოფლიო ბაზრის მონოპოლისტები არიან, თუმცა ყველა ცნობილი კომპანია ცდილობს, თავისი რესურსები ელ-მობილებისა და ჰიბრიდების შექმნას მოახმაროს.