არტისტული გაერთიანების LTFR-ის წარმომადგენლები, ქართული ჰიპ-ჰოპ დუოს, KayaKata-ს წევრები - მაქსიმე მაჩაიძე, ზურა ჯიშკარიანი და გიორგი კვეზერელი, სასცენო სახელით turbohikari, რუსთაველის გამზირზე მიმდინარე დემონსტრაციებს ახალი ერთობლივი ტრეკით ეხმაურებიან. პროექტს "ქართა ველი", ჰიპ-ჰოპ კომპოზიციას კი valley of the wind ეწოდება.

ჩვენი პროტესტი პოლიციის ბრუტალობას, პუტინის რუსეთს და ორკებს ვისაც <ქართა ველი> მხოლოდ თავისი ბოსტანი ჰგონია.. და ჩემი მხარდაჭერა მიმდინარე პროტესტებს და ბრძოლას შიდა ბესპრიძელის და გარე საფრთხეების წინაშე, მხარდაჭერა ყველა(!) ტომს, ვინც საკუთარი და საყოველთაო თავისუფლებისთვის იბრძვის: უკანონოდ დაჭერილ პატიმრებს (თავისუფლება ყველას!), დაჩაგრულ LGBT თემებს, ხმაწართმეულ დევნილებს გარეუბნებიდან და სხვა ქალაქებიდან, დებს და ძმებს, ვისთვისაც საკუთარი და სხვისი ცხოვრება ღირებულებას წარმოადგენს და. უბრალოდ. სურს თავისუფლად და მშვიდად ისუნთქოს. "მგელი ვარ ქართა ველის"! Gang!"

წერს ზურა ჯიშკარიანი თავისი ბლოგის ფეისბუქის გვერდზე.

19 ივნისს რუსი დეპუტატის, სერგეი გავრილოვის მიერ სკამის დაკავებას საპროტესტო ტალღა მოჰყვა. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას. აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო.

სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს.

აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ. დაზიანებები მიიღეს 30-ზე მეტმა ჟურნალისტმა, მათ შორის იყვნენ On.ge-ს სამი თანამშრომელი.