საპარლამენტო უმრავლესობის წევრი, მარიამ ჯაში ამბობს, რომ ის მზად არის, უმრავლესობასთან ისაუბროს, რატომ არ დაუჭირა მხარი დეპუტატ ნიკა მელიასთვის იმუნიტეტის შეჩერებას. მისივე თქმით, ის ასევე მზად არის, ნებისმიერი გადაწყვეტილება მოისმინოს.

"ვფიქრობ, რომ განსხვავებული აზრი მხოლოდ აძლიერებს ნებისმიერ გუნდს. თუკი ჩვენ გვექნება განხილვა, თუ ჩემი გადაწყვეტილება ჩაითვლება გუნდურობის პრინციპის საწინააღმდეგო ნაბიჯად, მე მზად ვარ, შედგეს ეს საუბარი და თუკი გუნდი მიიღებს გადაწყვეტილებას, რომ ეს შეიძლება აისახოს გუნდის მუშაობის შემდგომ ეტაპზე, მე მზად ვარ, რომ ნებისმიერი შესაბამი გადაწყვეტილება მოვისმინო", — თქვა ჯაშმა.

მისივე თქმით, დეპუტატ ნიკა მელიასთვის იმუნიტეტის შეჩერებას ორი მთავარი მიზეზით არ დაუჭირა მხარი. ეს მიზეზებია იმუნიტეტის პატივისცემა და სამართლებრივი საფუძველი.

"უპირველესი პრინციპი თავად პარლამენტარიზმის და პარლამენტის წევრის იმუნიტეტის პატივისცემა, რომელიც გვავალდებულებს, რომ მაქსიმალურად მყარი არგუმენტების შემთხვევაში მივიღოთ გადაწყვეტილება. მეორე — სამართლებრივი საფუძველი უკავშირდება თავად არგუმენტაციის სიძლიერეს და იმ მოცემულობას, რომლის საფუძველზეც ჩვენ უნდა მივიღოთ გადაწყვეტილება", — თქვა ჯაშმა.

საქართველოს პარლამენტმა 26 ივნისს პროკურატურას უფლება მისცა, რომ ნიკა მელია დაიჭირონ. მარიამ ჯაშმა კენჭისყრაში მონაწილეობა არ მიიღო. ქართული ოცნების დეპუტატებმა რომან კაკულიამ და პატრიოტთა ალიანსიდან მირიან წიკლაურმა კი ხმის მიცემის დროს თავი შეიკავეს.