საქართველოს პარლამენტის წევრი, ნუკრი ქანთარია ამბობს, რომ პრინციპული იყო ნაციონალური მოძრაობის ლიდერის, ნიკა მელიასთვის იმუნიტეტის შეჩერების პროცესში მონაწილეობა. მან ის თანაგუნდელები გააკრიტიკა, რომლებმაც ამ დადგენილების მიღებაში მონაწილეობისგან თავი შეიკავეს.

"ეს არის პოლიტიკა და პარლამენტი. ან პარლამენტი ან მონასტერი — არის ორი მხარე. ნაწილი ალბათ მონასტერში უნდა წავიდეს, ნაწილი პარლამენტში დარჩეს", — თქვა ქანთარიამ.

ქანთარიას ამ განცხადებას წინ უსწრებდა მისი თანაპარტიელის, მარიამ ჯაშის კომენტარი, რომელიც პროცესში მონაწილეობისგან თავის შეკავებას მიმტევებლობას უკავშირებდა.

On.ge-მ ქანთარიას ჰკითხა, თავის კომენტარში გულისხმობდა თუ არა მარიამ ჯაშს, რაზეც დეპუტატმა ასე უპასუხა:

"კონკრეტულად სახელს მე არ დავასახელებ, მიმხვედრი მიხვდება. [რა გინდათ] დავაკონკრეტო გვარი, სახელი, მამის სახელი?.. არ უნდა ამას ლაპარაკი, მიმხვედრი მიხვდება".

საქართველოს პარლამენტმა 26 ივნისს პროკურატურას უფლება მისცა, რომ ნიკა მელია დაიჭირონ. მარიამ ჯაშმა კენჭისყრაში მონაწილეობა არ მიიღო. ქართული ოცნების დეპუტატებმა რომან კაკულიამ და პატრიოტთა ალიანსიდან მირიან წიკლაურმა კი ხმის მიცემის დროს თავი შეიკავეს.