პატრიოტთა ალიანსის დეპუტატმა ემზარ კვიციანმა ნიკა მელიასთავის იმუნიტეტის შეჩერების სხდომაზე დეპუტატებს მისი დაცვისკენ მოუწოდა. კვიციანმა პროკურორს შესთავაზა, არის თუ არა შესაძლებელი თავდებში ჩაუდგეს მას რამდენიმე დეპუტატი, რომ ქვეყნიდან არ წავა და გამოძიებას ხელს არ შეუშლის. მან პროკურორს შინაპატიმრობის იდეაც შესთავაზა.

"უკვე აღძრულია სისხლის სამართლის საქმე მაგაზე, გირაოთია გამოშვებული და არ გაქცეულა არსად. დღესაც აგერ მოვიდა ზის და უყურებს ამ ყველაფერს. ანუ ყველა საფუძველი არსებობს იმისთვის რომ არსად არ გაიქცევა და რატომ არის აუცილებელი მაგის პატიმრობაში ყოფნა? მიუხედავად იმისა, რომ სხვადასხვა მიმართულებები გვაქვს პოლიტიკური, ის არის ჩვენი კოლეგა. ეს ისტორიაში ჩაიწერება რომ მე-9 მოწვევის პარლამენტარებმა თავიანთი კოლეგა გაწირეს. რადგანაც მივიღეთ, მოვიყვანეთ და დავსვით აქა, მაშინ კეთილი ინებეთ და დაიცვათ", — განაცხადა ემზარ კვიციანმა პლენარულ სხდომაზე სიტყვით გამოსვლისას.

დღეს, საქართველოს პარლამენტი ნაციონალური მოძრაობის დეპუტატის, ნიკა მელიას იმუნიტეტის შეჩერებაზე მსჯელობს. პარლამენტს პროკურატურამ მიმართა, რომელსაც მელიას დაკავება 20 ივნისის აქციის დროს ჯგუფური ძალადობის ორგანიზების ბრალდებით სურს.