ნაციონალური მოძრაობის წევრი მელია ქართული ოცნების დეპუტატებს მიმართავს "არ იდარდონ" და თავისუფლად დააჭირონ ღილაკს, რომლითაც პროკურატურას მისი დაპატიმრების ნებართვას მისცემენ. ამის შესახებ მელიამ ტელეკომპანია რუსთავი 2-თან ჩართვაში ისაუბრა. მისივე თქმით, მას პიროვნულად არანაირი პრეტენზია არ აქვს დეპუტატებთან და ებრძვის მხოლოდ ბიძინა ივანიშვილის მმართველობას. მელიას აზრით, დეპუტატები ბიძინა ივანიშვილის მმართველობის ტყვეობაში არიან:

"დარწმუნებული ვარ რომ ძალიან ბევრი ღელავს, არ არის სასიამოვნო ადამიანურად. მოვწონვარ თუ არ მოვწონვარ, ბევრ მათგანს წინა ცხოვრებიდან ვიცნობ. ემოციურად რთული იქნება ბევრი ქართული ოცნების დეპუტატისთვის. ბევრისთვის არ იქნება. ქუცნაშვილი რომ ყოფილიყო, ორივე ხელით დააჭერდა".