ნაციოანლური მოძრაობის წევრმა ნიკა მელიამ, რომლის ბრალდების დადგენილება გამოსცა პროკურატურამ, ამბობს, რომ მისთვის პატივი იქნება, როცა [გიორგი] გახარიასთან, [ბიძინა] ივანიშვილთან და [სერგეი] გავრილოვთან ბრძოლაში დაიჭერენ, თუკი ეს მოხდება. ამის შესახებ ნიკა მელიამ რუსთავი 2-თან საუბარში განაცხადა.

ნიკა მელია აცხადებს, რომ მისთვის მოულოდნელი არაფერი ყოფილა. მისივე თქმით, ტყუილად ფიქრობს ბიძინა ივანიშვილი, რომ მისი დაკავებით რამე შეიცვლება:

"ამით ახლა ბიძინა ივანიშვილი რას მიაღწევს, ჩემს პატიმრობას ვგულისხმობ. რა პანაცეაა და მოგვარდება და ხალხი გადაიფიქრებს, რომ ბიძინა ივანიშვილს, გახარია და გავრილოვი არის ცუდი? მარტივადაა საქმე: შეშინებული, აგონიური, დამფრთხალი ხელისუფლების მდგომარეობაა, რომელსაც მიაჩნია, რომ ოპოზიციურმა ლიდერებმა შეექმნეს ისტერიული პოლიტიკური ვითარება".

საქართველოს პროკურატურამ აქციის მიმდინარეობისას ჯგუფური ძალადობის ხელმძღვანელობისა და მასში მონაწილეობისთვის ნაციონალური მოძრაობის დეპუტატს ნიკა მელიას ბრალი წარუდგინა და პატიმრობის ნებართვისთვის საქართველოს პარლამენტს მიმართა.