პრეზიდენტის ადმინისტრაციის პრესსპიკერი, ხატია მოისწრაფიშვილი ამბობს, რომ 20 ივნისს აქციის დაშლის დროს სამართალდამცავებმა იმოქმედეს ისე, როგორ უნდა ემოქმედათ.

"თუმცა, ამ ქმედებების დროს თუ ჰქონდა ადგილი ძალის გადამეტებას, გადაცდომას, რა თქმა უნდა ეს არის გამოძიების თემა და პასუხი უნდა გაეცეს ყველა კითხვას. რა თქმა უნდა, თუ გამოვლინდება დამნაშავე, ის, ვინც გადაამეტა ძალას, ისიც უნდა დაისაჯოს", — განაცხადა ხატია მოისწრაფიშვილმა.

20-21 ივნისს პარლამენტთან მიმდინარე აქცია დაპირისპირებაში გადაიზარდა რა დროსაც, პოლიციამ ცრემლსადენი გაზით, რეზინის ტყვიებითა და წყლის ჭავლით აქცია დაშალა. მედიების გავრცელებულ კადრებში ჩანს, რომ სამართალდამცავები ახლო მანძილიდან უმიზნებდნენ შეუიარაღებელ ადამიანებს. გენერალური ინსპექცია სავარაუდო ძალის გადამეტება მოკვლევას უკვე ატარებს.

შინაგან საქმეთა სამინისტრომ განაცხადა 24 ივნისს, რომ დაშლაში მონაწილე 10 სამართალდამცავს უფლებამოსილება შეუჩერდა. მათი განმარტებით, აქედან 2 პირის ქმედებაში გამოიკვეთა სისხლის სამართლის დანაშაულის ნიშნები, ამიტომ მოპოვებული მასალები გადაიგზავნა გენერალურ პროკურატურაში.