ქართული ოცნების დეპუტატი, გია ვოლსკი პარლამენტის თავმჯდომარის პოსტზე არჩილ თალაკვაძის დანიშვნას აფასებს.

კითხვაზე, შეირჩა თუ არა არჩილ თალაკვაძე მორჩილების ნიშნით, გია ვოლსკი პასუხობს, რომ ქართულ ოცნებაში მორჩილი ადამიანები არ სჭირდებათ.

ბიძინა ივანიშვილთან დაკავშირებით ინტენსიურად ვრცელდებოდა და მომავალშიც გავრცელდება არასწორი ინფორმაცია, თუნდაც მისი პიროვნული თვისებების შესახებ. არავის მორჩილებას არავინ ითხოვს. ჩვენ 2011 წელში დავიწყეთ ურთიერთობა და მრჩეველთა საბჭოდან იყო გასული, ვინც გამოირჩეოდა მორჩილებით, რადგან მარგი ქმედების კოეფიციენტი მორჩილ ადამიანს არ გააჩნია, ასე განიხილება ჩვენთან ადამიანების შერჩევა", — თქვა მან.

გია ვოლსკიმ არჩილ თალაკვაძის არჩევის კრიტერიუმებზეც ისაუბრა და ერთ-ერთ კრიტერიუმად ცხოვრებისეული გამოცდილება დაასახელა.

"არჩილ თალაკვაძეს საკმაოდ დიდი ცხოვრებისეული გამოცდილება. ასევე უნდა ითქვას მისი დამოკიდებულება ქვეყნის მიმართ, ადამიანებისადმი, კოლეგიალობა. მას ასევე მნიშვნელოვანი თანამდებობები ეკავა სახელმწიფო მმართველობის სტრუქტურებში", — განაცხადა გია ვოლსკიმ.

საქართველოს პარლამენტის ახალი თავმჯდომარე ქართული ოცნების დეპუტატი არჩილ თალაკვაძეა. ის ამ დრომდე უმრავლესობის ლიდერის თანამდებობას იკავებდა. მის არჩევას 94 მომხრე და არც ერთი წინააღმდეგი ჰყავდა.

ირაკლი კობახიძის თანამდებობის დატოვების შესახებ 22 ივნისს ქართული ოცნების აღმასრულებელმა მდივანმა კახა კალაძემ განაცხადა. გადაწყვეტილება პოლიტსაბჭოს სხდომაზე მიიღეს.

მმართველი პარტიის განმარტებით, რუსი დეპუტატების საქართველოში ვიზიტისა და პარლამენტის თავმჯდომარის სკამის დაკავების შესახებ პოლიტიკური პასუხისმგებლობა, სწორედ, ირაკლი კობახიძემ აიღო.