საქართველოში უკრაინის ელჩმა, იგორ დოლგოვმა მართლმადიდებლობის საპარლამენტთაშორისო ასამბლეის პრეზიდენტის, რუსი დეპუტატის, სერგეი გავრილოვის გამოსვლის დროს დარბაზი პროტესტის ნიშნად დატოვა. ინფორმაციას ამის შესახებ პირველი არხი ავრცელებს.

"რუსეთს ოკუპირებული აქვს უკრაინის ტერიტორიები და დღესაც აგრძელებს ბრძოლას. დღეს ჩვენ გვყავს ერთი გარდაცვლილი და ოთხი დაჭრილი სამხედრო. ეს არის რუსეთი ჩვენთვის. ძალიან მარტივია, რაც ირაკლი კობახიძემ აღნიშნა, ქრისტიანული რელიგია და ეკლესია არის მშვიდობისა და მშვიდობიანი არსებობის და არა ტერიტორიების ოკუპაცია. სულ ეს არის. მე მეტი კომენტარი არ მაქვს", — დოლგოვის შეფასებას პირველი არხი ავრცელებს.

რუსი დეპუტატების ჩამოსვლას პრეზიდენტის ყოფილ სასახლესთან აპროტესტებენ მოქალაქეებიც. ისინი ბანერებით ხელში რუსეთის ოკუპაციას აპროტესტებენ და იძახდნენ "დაგმე რუსეთი".

19-22 ივნისს თბილისი მართლმადიდებლობის საპარლამენტთაშორისო ასამბლეას (IAO) პირველად უმასპინძლებს. 26-ე გენერალური ასამბლეის სესიის თემაა "პარლამენტარიზმის წვლილი თანამედროვე სოციალური და პოლიტიკური მოვლენების გააზრებაში". ასამბლეას რუსი დეპუტატებიც ესწრებიან.

დუმის დეპუტატების ჩამოსვლას აპროტესტებენ ოპოზიციაში. ევროპული საქართველოს წევრი, გიორგი კანდელაკი ამბობს, რომ დეპუტატების ჩამოსვლა ქვეყნის სუვერენიტეტსა და საერთაშორისო ავტორიტეტს ზიანს მიაყენებს. მმართველი გუნდის დეპუტატი ზაქარია ქუცნაშვილი კი აცხადებს, რომ მიუღებელი განცხადების გამო ქვეყანაში შემოსვლას ვერავის აუკრძალავენ და ამას საერთაშორისო პოლიტიკაში "ქაჯობა" უწოდა.

როგორც დღის წესრიგშია აღნიშნული, IAO-ს ღონისძიებები 19 ივნისს სახელმწიფო ცერემონიების სასახლეში დაიწყება და 22 ივნისს კახეთის მონახულებით დასრულდება. დღის წესრიგი ძირითადად ასამბლეის გენერალურ სესიაზე გამოსვლებსა და პრეზენტაციებს მოიცავს.