14 ივნისს კანცელარიასთან გამართული აქციისა და კონტრაქციის შემდეგ, შინაგან საქმეთა სამინისტრომ სახალხო დამცველის მიმართ ინტერნეტსივრცეში მუქარის შემცველი შეტყობინებების გავრცელების ფაქტზე გამოძიება დაიწყეს. უწყება იძიებს ამავე აქციაზე ჟურნალისტური საქმიანობისთვის ხელისშეშლის ფაქტებსაც.

კანცელარიასთან კონტრაქციის დროს სახალხო დამცველის მოადგილე გიორგი ბურჯანაძე იმყოფებოდა, რომელსაც შეურაცხყოფა მიაყენეს. "დაგიამხსოვრებთ", "დაგერხა" იმუქრებოდნენ ისინი და ომბუდსმენის წარმომადგენელს აგინებდნენ.

მეორე დღეს სახალხო დამცველი კონტრაქციას გამოეხმაურა და განაცხადა, რომ მნიშვნელოვანია თანამდებობის პირებმა, მიუხედავად პოლიტიკური განსხვავებისა, საჯარო განცხადებებით დაგმონ ძალადობა. ომბუდსმენის თქმით, პოლიტიკური სპექტრი უნდა შეთანხმდეს იმაზე, რომ რომელიმე ჯგუფის დამამცირებელი მოპყრობა, მათ მიმართ ძალადობის წახალისება დაუშვებელია.