თბილისის პრაიდის ერთ-ერთი ორგანიზატორი, გიორგი თაბაგარი საპატრიარქოს განცხადებას გამოეხმაურა და აღნიშნავს, რომ მათ შეუძლიათ იქადაგოს ის, რაც სურთ, მაგრამ ეს ძალადობაში არ უნდა გადაიზარდოს. მან საპატრიარქოს განცხადებას სამწუხარო უწოდა.

"მათ აქვთ თავისი აზრის გამოთქმის თავისუფლება ისევე, როგორც ნებისმიერ სხვა ჯგუფს ამ ქვეყანაში, მაგრამ ეს არ უნდა იყოს განმსაზღვრელი თუ რას და როგორ მოიმოქმედებს ნებისმიერი ჯგუფი და მით უმეტეს სახელმწიფო", — აღნიშნავს თაბაგარი On.ge-სთან საუბრისას.

თბილისი პრაიდი იმედოვნებს, რომ სახელმწიფო მათ დაიცავს და ეკლესიას ეტყვის, რომ "ძალაუფლების ვერტიკალი სხვანაირად არის გადანაწილებული".

"ჩვენ ვცხოვრობთ სახელმწიფოში, სადაც ჩვენი გადმოსახედიდან ეკლესიისა და სახელმწიფოს ფუნქციები გამიჯნული უნდა იყოს. ეკლესიას შეიძლება ჰქონდეს თავისი დოგმატური გაგება, თუმცა ეს არ უნდა აძლევდეს მას ძალადობის და ჩვენი კონსტიტუციური უფლებით სარგებლობის ხელის შეშლის შესაძლებლობას. ჩვენ ველოდებით, რომ სახელმწიფო იქნება მოწოდების სიმაღლეზე. ეკლესია არ განაგებს საერო ხელისუფლებას", — აღნიშნა თაბაგარმა.

მართლმადიდებელი ეკლესიის საპატრიარქომ დღეს, 14 ივნისს ხელისუფლებას მოუწოდა, რომ თბილისი პრაიდი არ დაუშვან. განცხადებაში საპატრიარქო აღნიშნავს, რომ ლგბტ თემი და მათი მხარდამჭერები უცხო ქვეყნებს ისე აწვდიან ინფორმაციას, "თითქოს საქართველოში ისინი დიდად შევიწროებულნი და დევნილნი არიან და ამ მოტივით სერიოზულ დაფინანსებას იღებენ".

"მათ სურთ თავისი აქტივობა ისე წარმოაჩინონ, როგორც დისკრიმინაციის წინააღმდეგ ბრძოლა, სინამდვილეში კი ეწევიან თავისი ცხოვრების წესის პოპულარიზაციას და პროპაგანდას და მისი ოფიციალურად დაკანონება აქვთ განზრახული.

როდესაც მცირე ჯგუფი ცდილობს თავისი პოზიცია თავს მოახვიოს მთელ მოსახლეობას, ეს, თავისთავად, იწვევს მკვეთრ უკურეაქციას, ვინაიდან წარმოადგენს მიზანმიმართულ ქმედებას, უმრავლესობის ღირსების შეურაცხყოფას, მათ არჩევანზე ძალადობას და ამდენად არის მაპროვოცირებელი არეულობისა და დაპირისპირებისა", — აღნიშნულია განცხადებაში.

ყოველი წლის ივნისში, პრაიდის სთვის ფარგლებში სხვადასხვა ქვეყანაში ლგბტ თემის მხარდასაჭერი ღონისძიებები იმართება. საქართველოში პირველად 18-დან 23 ივნისის ჩათვლით LGBTQI თბილისის პრაიდი დაიგეგმა. კვირეულის ფარგლებში სხვადასხვა სოციალური, კულტურული და პოლიტიკური ღონისძიება და ღირსების მარში გაიმართება.