შინაგან საქმეთა სამინისტროს განცხადებით, დაბა წაღვერთან ძარცვისა და მკვლელობის ბრალდებით 1998, 2000 და 2002 წლებში დაბადებული სამი პირი დააკავეს. ბრალი 5-დან 15 წლამდე ვადით თავისუფლების აღკვეთას ითვალისწინებს.

გამოძიების ინფორმაციით, 12 ივნისს დაბა წაღვერის მიმდებარედ, 1960 წელს დაბადებულ პირს ურთიერთშელაპარაკების შემდეგ რამდენიმე პირმა ავტომობილი დაუზიანა, ერთ-ერთმა მათგანმა კი თავის არეში სიცოცხლისთვის საშიში ჭრილობა მიაყენა. დაზარალებული ადგილზე გარდაიცვალა, ხოლო თავდამსხმელები შემთხვევის ადგილიდან მიიმალნენ. გარდა ამისა, შსს-ში აცხადებენ, რომ ბრალდებულები მკვლელობის ადგილიდან რამდენიმე კილომეტრის მოშორებით, ავტოგასამართ სადგურში მივიდნენ და ძალადობის მუქარით ოპერატორი გაძარცვეს.

დაკავებულთაგან ერთს ბრალად ედება განზრახ მკვლელობა, ხოლო დანარჩენი ორი წინასწარი შეთანხმებით ჯგუფის მიერ ძალადობის გამოყენების მუქარით ჩადენილ ძარცვაში არიან ბრალდებული. უწყების თქმით, დაკავებულები დანაშაულს აღიარებენ.

განზრახ მკვლელობის და ძარცვის ფაქტებზე გამოძიება სისხლის სამართლის კოდექსის 178-ე მუხლის მე-3 ნაწილის "ა" და "დ" ქვეპუნქტებით და 108-ე მუხლით მიმდინარეობს.