2004 წელს მოკლული ბუტა რობაქიძის მამა, სოსო რობაქიძე მაშინდელ შს მინისტრის ირაკლი ოქრუაშვილის პარტიის პრეზენტაციაზე მივიდა. ადგილზე ლიდერები ჯერ არ იყვნენ მისული, რობაქიძემ კი ჟურნალისტებს უთხრა, რომ ოქრუაშვილის პარტიაში ვინც გაწევრიანდება "კრიმინალია". მან ასევე თქვა, რომ განაახლებს ორგანიზაცია "გადაარჩინე სიცოცხლეს", რითაც შეეწინააღმდეგება "კრიმინალების პოლიტიკაში დაბრუნებას".

"უნდა იცოდეს ყველამ, ვინ არის ადეიშვილი, ვინ არის ოქრუაშვილი, ამ ხალხს, ამ პარტიებს რომელთაც დიდი გაერთიანების გაკეთება უნდათ, არ უნდა ჰქონდეთ არანაირი შანსი იმისთვის რომ მთავრობაში მოვიდნენ. მე გავაცოცხლებ ორგანიზაცია “გადაარჩინე სიცოცხლე” და დავანახებ ყველას, რომ რასაც შეცდომას ეძახიან, დანაშაულია. ვინც ამ ხალხის გვერდით დადგება, ჩემ თვალში კრიმინალია", — განაცხადა სოსო რობაქიძემ.

მისი თქმით, გული წყდება იმიტომ, რომ ყველაზე დიდ პატივს სცემდა გუბაზ სანიკიძეს და მას ოქრუაშვილის მხარდაჭერის გამო ცალკე დაელაპარაკება.

"არ ვაცლი, პარტიასაც დავუშლი მარტივ მამრავლებად. ეს კაცი უნდა იყოს ციხეში. კრიმინალები მოდიან პოლიტიკაში. ეგ კაცი არის მატყუარა, როგორ უნდა მოვიდეს პოლიტიკაში?! ეგ კაცი წავა ციხეში და მაგიტომ ქმნის პარტიას რომ პოლიტპატიმარი ერქვას", — განაცხადა რობაქიძემ.