სასამართლოს უპატივცემულობის საქმეზე დაკავებულის, ზვიად კუპრავას საქმეზე განაჩენის გამოცხადება პროკურორის არყოფნის გამო გადაიდო. მოსამართლე ელენე გოგუაძემ განმარტა, რომ საპროცესო კანონმდებლობის თანახმად მას მხარეების რეპლიკები და ბრალდებულის დასკვნითი სიტყვა უნდა მოესმინა, რის შემდეგაც სათათბიროდ უნდა გასულიყო. მოსამართლის თქმით, რადგანაც პროკურორი ჯანმრთელობის მდგომარეობის გამო ვერ გამოცხადდა და კანონმდებლობით გათვალისწინებული ქმედებები ვერ განხორციელდებოდა, მას პროცესის გადადება მოუწევს.

ამასთან, ზვიად კუპრავას ხვალ, 12 ივნისს გადიოდა აღკვეთის ღონისძიების ვადა — პატიმრობა. დაცვის მხარე მის თავდებით გათავისუფლებას ითხოვდა. მას თავდებად დაუდგნენ ნაციონალური მოძრაობის დეპუტატები რომან გოცირიძე, ნიკა მელია, მამუკა ჩიქოვანია და კობა ნაყოფია. ამასთანავე, დპარლამენტის დეპუტატებმა თინა ბოკუჩავამ, აზერ სულეიმანოვმა და სალომე სამადაშვილმა წერილობით დაადასტურეს, რომ მზად იყვნენ კუპრავას თავდებში ჩადგომოდნენ. მოსამართლემ გადაწყვეტილება მიიღო და კუპრავა განაჩენის გამოცხადებამდე პატიმრობაში დატოვა.

ჯერჯერობით უცნობია, როდის გამოცხადდება კუპრავას საქმის გადაწყვეტილება. მოსამართლის თქმით პროცესის თარიღი მხარეებთან მოლაპარაკების შემდეგ ჩაინიშნება.

გამოძიების ინფორმაციით, 2018 წლის 11 ივნისს ზვიად კუპრავამ სასამართლოს შენობაში სიტყვიერი შეურაცხყოფა მიაყენა მოსამართლეს, რისთვისაც მას ბრალი წარედგინა სისხლის სამართლის კოდექსის 366-ე მუხლით (სასამართლოს უპატივცემულობა). ამისთვის ზვიად კუპრავას აღკვეთის ღონისძიების სახით შეეფარდა გირაო.

გირაოს ქვეშ მყოფმა ზვიად კუპრავამ, ასევე სასამართლოს მიმდებარე ტერიტორიაზე, ფიზიკური შეურაცხყოფა მიაყენა ადვოკატს. აღნიშნული ქმედებისთვის ზვიად კუპრავას სისხლის სამართლის კოდექსის 126-ე მუხლით (ძალადობა) ბრალი დაუსწრებლად წარედგინა, ვინაიდან მან თავი აარიდა სამართალდამცავ ორგანოში გამოცხადებას.

გირაოს პირობების დარღვევის, ახალი დანაშაულის შესაძლო ჩადენის, სამართალდამცავ ორგანოში არგამოცხადების, მართლმსაჯულებისთვის თავის არიდების გამო, სასამართლოს გადაწყვეტილებით მიმდინარე წლია 21 თებერვალს ზვიად კუპრავას გირაო შეეცვალა უფრო მკაცრი აღკვეთის ღონისძიებით — პატიმრობით.