თავდაცვის ყოფილი მინისტრი, ირაკლი ოქრუაშვილი ახალ პოლიტიკურ მოძრაობას აფუძნებს და აცხადებს, რომ მათი სურვილია, შეიქმნას გაბრაზებული ხალხის დიდი მოძრაობა. ამის შესახებ მან რუსთავი 2-თან ინტერვიუში განაცხადა. მისი ახალი პოლიტიკურ მოძრაობის ოფიციალური პრეზენტაცია ხვალ, 11 ივნისსაა დაგეგმილი. ირაკლი ოქრუაშვილის თანამებრძოლი, კოტე კემულარია ამბობს, რომ მოძრაობას "გამარჯვებული საქართველო" ერქმევა.

ოქრუაშვილის თქმით, ძალიან ბევრი არანაკლები სიმძიმის კატაკლიზმები გადაუტანია საქართველოს და ბიძინა ივანიშვილი არ არის გამონაკლისი:

"იგი წავა და სხვა მოვა ტურფასა საბაღნაროსაო, ნათქვამია", — ამბობს ირაკლი ოქრუაშვილი და განმარტავს, რომ აქვთ თუ არა მათ "მესამე ძალის" ამბიცია, ამას ხალხი გადაწყვეტს.

ირაკლი ოქრუაშვილი წლების განმავლობაში ნაციონალური მოძრაობის ხელისუფლებაში ყოფნის პირველ ნახევარში, სხვადასხვა დროს, იყო თავდაცვის, შინაგან საქმეთა და ეკონომიკის მინისტრი. მოგვიანებით, მან პარტია შექმნა და მაშინდელ ხელისუფლებას, თავის ძველ გუნდს დაუპირისპირდა.