მადრიდის ატლეტიკოში გატარებული წლების შემდეგ ანტუან გრიზმანმა გასულ თვეს გამოაცხადა, რომ კლუბიდან წასვლას აპირებს და გულშემატკივრებს დაემშვიდობა. ერთ-ერთი კლუბი, სადაც, ფანების აზრით, ფეხბურთელი შეიძლება გადასულიყო, ბარსელონაა. დაირხა ხმები ასევე პარის სენ-ჟერმენისა და მანჩესტერ იუნაიტედის შესახებ.

ერთ-ერთი ვერსიით, გრიზმანის შემოერთების იდეა ბარსელონას ფეხბურთელებს დიდად არ მოეწონათ. გავრცელდა ჭორი იმის შესახებაც, რომ ბარსელონამ გრიზმანის კანდიდატურა კონკრეტულად ლგბტ უფლებების მხარდაჭერის გამო დაიწუნა და თითქმის შემდგარი ტრანსფერი ამის გამო ჩაიშალა, თუმცა ეს ჭორი ატლეტიკოს პრეზიდენტმა მაშინვე უარყო: მან თქვა, რომ ბარსელონადან მას არავინ დაკავშირებია და ჯერ არ იცის, საით გაუწევია გრიზმანს 2019/2020 სეზონისათვის.

გრიზმანი და ლგბტ უფლებები

28 წლის ანტუან გრიზმანს საფეხბურთო საზოგადოებაში არსებულ ჰომოფობიაზე ბევრჯერ უსაუბრია. საფრანგეთში არსებულ ლგბტ გამოცემასთან, Tetu-სთან საუბარში მან ყურადღება გაამახვილა იმაზე, ჰომოფობია იდეა კი, არა დანაშაულია. ფეხბურთელმა ასევე განაცხადა, რომ დროა, დასრულდეს სტადიონზე ჰომოფობიური შეძახილები.

გრიზმანმა დოკუმენტურ ფილმში Footballer and homo, at the heart of the taboo ორიენტაციის გაცხადების სირთულეებზეც ისაუბრა:

"როცა ფეხბურთელი ხარ, თითქმის შეუძლებელია იმის თქმა, რომ გეი ხარ. მე გამიხარდებოდა, თუ თანაგუნდელი ამას გამიმხელდა. საჯაროდ ამ თემაზე ლაპარაკი სხვებისთვის კარის გახსნას ნიშნავს. ცხადია, რომ ამ განცხადებას კრიტიკა მოჰყვება, მაგრამ ასეთ დროსაც უნდა გავამხნევოთ ფეხბურთელები და თავი ამაყად ვაგრძნობინოთ".

ბარსელონა ჰომოფობიის წინააღმდეგ

საფეხბურთო კლუბი ბარსელონა გაცხადებულად უჭერს მხარს თანასწორობას. რამდენიმე წლის წინ, როცა ესპანეთში ერთ-ერთმა მსაჯმა ღიად განაცხადა, რომ გეია, ბარსელონამ ის კამპ ნოუზე მიიწვია.

ახალგაზრდა მსაჯმა, ხესუს ტომილიერომ კარიერის დასრულება გადაწყვიტა, მას შემდეგ, რაც მაყურებლებისგან მიყენებული შეურაცხყოფა აუტანელი გახდა, თუმცა მოგვიანებით მან გადაწყვეტილება შეცვალა და გადაწყვიტა გაეგრძელებინა იმ საქმის კეთება, რომელიც უყვარს.

ბარსელონა ჰომოფობიასთან ბრძოლაში 2015 წელს ჩაება. ამავე წელს კლუბმა გაავრცელა ვიდეო, რომელშიც დანი ალვეში და ანდრეს ინიესტა მონაწილეობენ. ვიდეოში გუნდურობისა და პატივისცემის მნიშვნელობაზეა ყურადღება გამახვილებული.

ჰომოფობია საფეხბურთო საზოგადოებაში ჯერაც მოუგვარებელი პრობლემაა, ბარსელონა კი თანასწორობისთვის ბრძოლაში ერთ-ერთი მნიშვნელოვანი მოთამაშეა. ასე რომ, გრიზმანისა და ბარსელონას შეხედულებებში ამ კუთხით აცდენა ნამდვილად არ ყოფილა.