არასამთავრობო ორგანიზაცია თავისუფალი ზონა 10–მდე აქტივისტმა დატოვა, რომელთა შორისაა ერთ–ერთი ყველაზე აქტიური წევრი ბესო კალაძე.

პორტალ კვირას პრესკლუბში გამართულ პრესკონფერენციაზე ბესო კალაძემ ისაუბრა იმის შესახებ, რომ თითქოს, საქართველოს პრეზიდენტის, მიხეილ სააკაშვილის დავალებით ნაციონალური მოძრაობა გეგმავდა საქართველოში დესტაბილიზაციის მოწყობას:

"რამდენიმე დღის წინ ვიყავი უკრაინაში, შევხვდი მიხეილ სააკაშვილს, გავაცანი მას ჩემი შეხედულებები, მას შევთავაზე ჩემი რესურსის საარჩევნოდ გამოყენება და კონკრეტული ფაქტების შესახებ მქონდა საუბარი. ამასთანავე, მე ჩემი გულისტკივილი გამოვხატე მასთან მოსალოდნელ არეულობასთან დაკავშირებით, რომელიც პარტიაში ვრცელდებოდა. მიხეილ სააკაშვილისგან მე მივიღე კონკრეტული პასუხი, რომ მას ჩემი და თავისუფალი ზონის რესურსი არ სჭირდება საარჩევნოდ, ეს ხალხი მას სჭირდება არჩევნების შემდგომ არეულობის მოსაწყობად".

ბესო კალაძის მტკიცებით, მოსალოდნელი დესტაბილიზაციის ორგანიზაციაში თავისუფალი ზონის გარდა ჩართულია ორგანიზაცია საქართველოს ერთგულების სახელით. კერძოდ, უნდა მომხდარიყო სახელმწიფო უწყებების ბლოკირება, რაც სავარაუდოდ, გამოიწვევდა აქციის დარბევას ხელისუფლების მხრიდან.

აღნიშნული პრესკონფერენციის შემდეგ, ბესო კალაძე და მისი თანამოაზრეები შინაგან საქმეთა სამინისტროში დაიბარეს დაკითხვაზე, სადაც ისინი დღეს იმყოფებოდნენ.

ყოფილი თანაგუნდელების ბრალდებებს აბსურდი უწოდეს თავისუფალ ზონაში. ნაციონალური მოძრაობის ლიდერები კი დარწმუნებულნი არიან, რომ ეს არის სახელმწიფო უსაფრთხოების სამსახურის მიერ დაგეგმილი სპექტაკლი.