შინაგან საქმეთა მინისტრის მოადგილის, ვლადიმერ ბორცვაძის განცხადებით, მას შემდეგ, რაც ხორავას ქუჩის საქმეზე სააპელაციო სასამართლოს დღევანდელ გადაწყვეტილებას გაეცნობიან, შესაბამისი საგამოძიებო მოქმედებები დაიწყება.

"ჩვენ აუცილებლად ვიმსჯელებთ და ჩავატარებთ შესაბამის საგამოძიებო მოქმედებებს უმოკლეს ვადებში. უმოკლეს ვადებში ვიმსჯელებთ ამ დანაშაულში სხვა პირთა შესაძლო თანამონაწილეობაზე", — თქვა ვლადიმერ ბოლქვაძემ.

დღეს, 3 ივნისს, სააპელაციო სასამართლომ დავით სარალიძეს ჯგუფურ მკვლელობაში დაუდგენელ პირებთან ერთად გ.ჯ. დამნაშავედ ცნო. ამ გადაწყვეტილებით თბილისის სააპელაციო სასამართლოს მოსამართლეთა პალატამ ნაწილობრივ შეცვალა საქალაქო სასამართლოს გადაწყვეტილება და ნაწილობრივ გაიზიარა ბრალდების მხარის პოზიცია.

საქალაქო სასამართლოს გადაწყვეტილებით, გ.ჯ. მსჯავრდებული იყო დავით სარალიძის დამამძიმებელ გარემოებაში მკვლელობის მცდელობისთვის და 10 წლითა და 6 თვით თავისუფლების აღკვეთა ჰქონდა შეფარდებული. სააპელაციო სასამართლოს გადაწყვეტილებით, არასრულწლოვანთა მართლმსაჯულების კოდექსის თანახმად, გ.ჯ.-ს სასჯელის სახით განესაზღვრა თავისუფლების აღკვეთა 11 წლითა და 3 თვის ვადით.

რაც შეეხება გ.ბ.-ს, სააპელაციო სასამართლოს გადაწყვეტილებით, გ.ბ.-ს მონაწილეობა არ მიუღია დავით სარალიძის მკვლელობაში. სააპელაციო სასამართლომ ძალაში დატოვა საქალაქო სასამართლოს გადაწყვეტილება ლევან დადუნაშვილის მკვლელობასთან დაკავშირებით და დამნაშავედ ცნო გ.ბ. მას სასჯელი დაუმძიმდა და პატიმრობად 11 წელი და სამი თვე განესაზღვრა.

გაიგე მეტი: 1 წელი ხორავას ქუჩის ტრაგედიიდან — მოკლედ