სერ ელტონ ჯონმა რუსეთში მასზე შექმნილი ფილმის დაცენზურების ფაქტი გააკრიტიკა. Rocketman მომღერლის ცხოვრებასა და გზას ეძღვნება.

გავრცელებული ინფორმაციით, ფილმიდან დაახლოებით 5 წუთია "გამქრალი". რუსი დისტრიბუტორები ამბობენ, რომ სხვანაირად ადგილობრივ კანონებს შეეწინააღმდეგებოდნენ.

ელტონ ჯონმა და ფილმის შემქმნელებმა განცხადება გაავრცელეს, სადაც აღნიშნეს, რომ ფილმიდან ნარკოტიკებისა და გეი სცენების ამოჭრის შესახებ ისინი არავის გაუფრთხილებია.

"ის რომ ადგილობრივმა დისტრიბუტორებმა ფილმიდან გარკვეული სცენები ამოჭრეს და მაყურებელს საშუალება არ მისცეს, ჩვენ მიერ ჩაფიქრებული ვერსია ენახათ, გვაჩვენებს, რომ ჯერაც სევდიან, დაყოფილ სამყაროში ვცხოვრობთ. როგორც ჩანს, ბევრისთვის ჯერაც მიუღებელია ის, რომ ორ ადამიანს ერთმანეთი უყვარს", - წერია განცხადებაში.

რუსული სადისტრიბუციო კომპანიის, Central Partnership-ის წარმომადგენელი ოლგა ლიუბიმოვა ამბობს, რომ ფილმიდან სცენების ამოჭრის ფაქტს ცენზურა არ უნდა ეწოდოს:

"უამრავ დასავლურ და რუსულ ფილმშია ნაჩვენები ნარკოტიკების მოხმარების პრობლემა. ჩვენ არაფერს ვაცენზურებთ, თუმცა რუსული კანონები გვავალდებულებს, რომ პედოფილია, ეთნიკური და რელიგიური სიძულვილი და პორნოგრაფია არ ვაჩვენოთ".

კრიტიკოსი ანტონ დოლინი ამბობს, რომ ყველა სცენა, სადაც კაცებს შორის კოცნა, სექსი, ან ორალური სექსია ნაჩვენები, ამოჭრილია.

"ყველაზე ცუდი კი ისაა, რომ დასასრულიც შეცვლილია", - ამბობს ის და სერ ელტონ ჯონის ქმრისადმი მიძღვნილ სცენაზე საუბრობს.

მომღერლის განცხადებაში ნათქვამია ისიც, რომ "აუცილებელია ხიდების აშენება და ღია დიალოგი, რითაც ბარიერებს დავანგრევთ, სანამ მთელ სამყაროში ყველა ადამიანი თანასწორი არ იქნება".

ფილმში მთავარ როლს ტერონ ეგერტონი თამაშობს, რომელიც ყველა სიმღერას თავად ასრულებს. საქართველოს კინოთეატრებში Rocketman-ის ნახვა 3 ივნისიდან იქნება შესაძლებელი.

ამავე თემაზე: