გადაცემაში შეხვედრები რეგიონულ მედიასთან ბიძინა ივანიშვილმა განაცხადა, რომ განმუხურში უნიკალური სასტუმრო აშენდება და აფხაზებს გამყოფი ხაზის იქითაც შესთავაზა მსგავსი ტიპის სასტუმროს აშენება:

"დღეს განმუხურში გაიხსნება მშენებლობა. იქ თანაინვესტირების ფონდის დაფინანსებით უნიკალური სასტუმრო აშენდება. გამყოფ ხაზთან მიჯრით, ყველაზე ახლოს და სასტუმროს უკან აშენდება ბოტანიკური ბაღი, რომელსაც ფონდი ქართუ დააფინანსებს. ბოტანიკური ბაღის იდეა იყო ჩემი. უნიკალური ადგილია თავისი კლიმატით. თვალში გვხვდება, რომ უკანა ზოლი არ არის საკმაოდ გამწვანებული. ზუსტად გამყოფ ხაზთან ააშენებს თანაინვესტირების ფონდი სასტუმროს, წინ ზღვა და სასტუმროს უკან ბოტანიკური ბაღი. ამასთან დაკავშირებით ჩვენი აფხაზის ძმებისთვის შეთავაზება მინდოდა გამეკეთებინა საქმიანი წინადადება, ხაზს იქითაც ვთავაზობ ასეთივე კლასის სასტუმროს აშენებას. გავაგრძელებდი ბოტანიკურ ბაღს გამყოფ ხაზს იქითაც. ამავდროულად, სასტუმროდან ყველა მოგება ადგილობრივ ინფრასტრუქტურას და მოსახლეობის კეთილდღეობის ამაღლებას მოხმარდებოდა. ამით წვლილი მინდოდა შემეტანა ჩვენი ურთიერთობის აღდგენაში".

მისი თქმით, უკვე იყო მცდელობა, რომ აღნიშნულთან დაკავშირებით ინფორმაცია აფხაზური მხარისთვის მიეწოდებინათ, თუმცა აფხაზური მხარის პასუხის შესახებ ივანიშვილი ინფორმაციას ჯერ არ ფლობს.

შეხვედრები რეგიონულ მედიასთან - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერმინისტრი, ბიძინა ივანიშვილი მონაწილეობს. გადაცემას 20:30-ის ჟურნალისტები ნათია თოიძე და მიხეილ ფეიქრიშვილი უძღვებიან.