"რაღაც ნებართვის წინა ნებართვა გაიცა, რომელიც 24 საათში გაუქმდა, ეს არის მთელი დისკომფორტის წყარო?" — ასე გამოეხმაურა ივანე მაჭავარიანი ანაკლიის კონსირციუმთან დაკავშირებით საერთაშორისო დონორების შეშფოთების შესახებ გავრცელებულ ინფორმაციას. ფინანსთა მინისტრმა აღნიშნა, სახელმწიფო უამრავ დათმობაზე წავიდა იმის მიუხედავად, რომ არ ევალებოდა.

"თქვენ რომ საერთაშორისო დონორი იყოთ და ნახოთ, რომ სახელმწიფო ხარჯავს ინფრასტრუქტურისთვის 300 მილიონს ერთ შემთხვევაში, იძლევა 100 მილიონს, 70 მილიონს, პროექტი თავდაპირველ ვარიანტთან შედარებით რამდენჯერმე არის შემცირებული და ამაზე წამოვიდა. რვა პუნქტიდან შვიდზე მოხდა შეთანხმება, რომელიც უამრავ სხვადასხვა რისკის დაზღვევასთან არის დაკავშირებული", — განაცხადა მან.

მაჭავარიანის თქმით, თუ საქმის გაკეთება ვინმეს უნდა, არანაირი მიზეზი არ არის დასაბრკოლებლად. მაჭავარიანმა აღნიშნა, რომ ერთადერთ პრობლემად კომერციული რისკები რჩება, რომელზეც პასუხისმგებლობა სახელმწიფოს არ ეკისრება.

ანაკლიის განვითარების კონსორციუმში განაცხადეს, რომ ფოთში ახალი ღრმაწყლოვანი ნავსადგურის მშენებლობის ნებართვის გაცემაზე მთავრობამ არაფერი შეატყობინა და ამის შესახებ მედიიდან გაიგეს. მათი თქმით, ნებართვა ეკონომიკის სამინისტრომ 2 მაისს ეიპიემ ტერმინალსის შვილობილი კომპანიის, სს კორპორაცია ფოთის საზღვაო ნავსადგურის სასარგებლოდ გასცა. მათივე თქმით, საერთაშორისო პარტნიორებმა ფაქტის "დამალვასთან" დაკავშირებით მწვავე შეფასებები გამოთქვეს.

ეკონომიკისა და მდგრადი განვითარების მინისტრმა, ნათია თურნავამ თქვა, რომ პორტის მშენებლობის ნებართვის გაცემასთან დაკავშირებით, რეაქციები არაადეკვატური იყო. მან აღნიშნა, რომ ანაკლიის პორტს აზიანებს ის აჟიოტაჟი, რაც ინვესტორმა ატეხა და "რეაქცია აშკარად გადაჭარბებულია".

ფოთში ახალი ღრმაწყლოვანი ნავსადგურის მშენებლობის ნებართვის დოკუმენტი 30 მაისს გაუქმდა.