Netflix-ის დევიდ ლეტერმანის შოუში, ამერიკელმა ტელე-წამყვანმა ელენ დეჯენერესმა გაიხსენა, რომ თინეიჯერობის ასაკში სექსუალური ძალადობის მსხვერპლი იყო.

ინტერვიუში, რომელიც სრულად პარასკევს გამოდის, დეჯენერესი ამბობს, რომ მოძალადე მისი მამინაცვალი იყო. მისი სიტყვებით, ის თინეიჯერი იყო, როცა დედამისს, ბეტის ძუძუს კიბოს დიაგნოზი დაუსვეს და სწორედ მაშინ დაიწყო მამინაცვალმა მასზე ძალადობა:

"დედა ქალაქგარეთ იყო, როდესაც მითხრა, რომ დედაჩემის მკერდში შებერილობა სწორედ მან აღმოაჩინა და ამიტომ, მეც უნდა შევემოწმებინე. მოკლედ, მან მე დამარწმუნა, რომ ჩემი მკერდი უნდა შეემოწმებინა და ამის გამეორებას ის შემდეგ ჯერზეც ცდილობდა".

დეჯენერესმა მამინაცვლის მხრიდან ძალადობაზე პირველად 2005 წელს, ჟურნალთან Allure ინტერვიუში ისაუბრა. მაშინ დეჯენერესმა თქვა, რომ მამინაცვალი ერთხელ მის ოთახში შევარდნას და კარის შემტვრევას ცდილობდა, მას კი ფანჯრიდან გაქცევა მოუწია.

როგორც ელენმა ლეტერმანს უთხრა, მან თავისი ისტორია სხვა ქალებისა და გოგოების გასაძლიერებლად მოყვა:

"ჩემს თავზე ვბრაზობ, რადგან ძალიან სუსტი ვიყავი იმისთვის, რომ ჩემი თავი დამეცვა. 15 ან 16 წლის ვიყავი. ეს საშინელი, საშინელი ისტორიაა და ერთადერთი მიზეზი, რისთვისაც ამ დეტალებს ვიხსენებ ისაა, რომ არ მინდა სხვა გოგოებმაც მისცენ ვინმეს ამის გაკეთების უფლება".

დეჯენერესის თქმით, მას დედამისის გრძნობების დაცვა უნდოდა და ამის შესახებ მას მაშინვე არ უთხრა:

"არასდროს არ უნდა დამჭირვებოდა დედაჩემის დაცვა. მე საკუთარი თავი უნდა დამეცვა და ამის ნაცვლად, მას წლების განმავლობაში არ ვუყვებოდი მომხდარზე. როცა ვუთხარი, მან არ დამიჯერა და იმ კაცთან კიდევ 18 წელი იყო დაქორწინებული. თუმცა, საბოლოოდ მიატოვა, რადგან ის ამ ისტორიას ყოველ ჯერზე სხვადასხვანაირად ყვებოდა".

ელენი სექსუალური ძალადობის მსხვერპლ ადამიანებს მხარდაჭერას უცხადებს:

"ჩემში განრისხებას იწვევს, როცა ვხედავ, რომ ადამიანები საკუთარ მძიმე გამოცდილებაზე ყვებიან და მათ არ უჯერებენ. ჩვენ ასეთ რამეებს არ ვიგონებთ", — დასძენს ის.

დეჯენერესი ძალადობის სხვა მსხვერპლებს მოუწოდებს, რომ სიჩუმით თავი არ დაიტანჯონ.