დავით გარეჯის არქიმანდრიტი კირიონი აცხადებს, რომ საზღვრის დემარკაციის საკითხის მოუგვარებლობით ხელისუფლება პროვოკაციას უწყობს საკუთარ ხალხს. მისი თქმით, მთავრობა უმოქმედოა და ქვეყნის სუვერენიტეტს არ იცავს.

"ეს არის ჩვენი ხელისუფლების სახე. ხელისუფლება, რომელიც არ იცავს ჩვენი ქვეყნის ინტერესებს და მის უპირველეს მოვალეობას და ვალდებულებას, ტერიტორიული მთლიანობის დაცვას", — განაცხადა კირიონმა.

მანვე აღნიშნა, რომ დამოუკიდებლობის დღე 26 მაისს რუსთაველსა და თავისუფლების მოედანზე ცეკვა-თამაშით არ უნდა აღინიშნოს, რადგან დამოუკიდებლობის საკითხი ახლა დავით გარეჯზე გადის.

დღეს, 25 მაისს სასულიერო პირებმა გაავრცელეს ინფორმაცია, რომ აზერბაიჯანელმა მესაზღვრეებმა სამუშაოები განაახლეს და ჩიჩხიტურის კოშკს მიუახლოვდნენ. საგარეო საქმეთა მინისტრის მოადგილემ, ლაშა დარსალიამ დაადასტურა, რომ კოშკი საქართველოს კონტროლირებად ტერიტორიაზე დგას და განაცხადა, რომ ვინც მესაზღვრეების მიახლოებაზე საუბრობს, მან ზუსტად უნდა გაზომოს დაშორება ან რუკებს დახედოს.

"მაქსიმალურად უნდა მიეცეს დელიმიტაციის კომისიებს მუშაობა, სწორედ ემოციებისგან დაცლილ ფონზე წარმართონ, რადგან მაღალი ემოციური ფონი მხოლოდ და მხოლოდ ხელს უშლის ნორმალური გადაწყვეტილების მიღებას ", — განაცხადა დარსალიამ.

საგარეო საქმეთა სამინისტრომ დღეს გაავრცელა ინფორმაცია, რომ დავით გარეჯში საზღვრის დემარკაციის საკითხზე აზერბაიჯანულ მხარესთან მოლაპარაკება გაიმართა. უწყების განცხადებით, მხარეები შეთანხმდნენ, რომ ექსპერტებთან ერთად ადგილზე დაათვალიერონ შეუთანხმებელი მონაკვეთები.

23 მაისს ადგილობრივმა გიდმა ზვიად ანანიაშვილი ფეისბუქზე ფოტოები გაავრცელა, სადაც წერდა, რომ დავით გარეჯში ჩიჩხიტურის მიმართულებით აზერბაიჯანის მხარეს გზა გაჰყავს. პარალელურად, 23-24 მაისს საქართველო-აზერბაიჯანის სახელმწიფო საზღვრის სადელიმიტაციო კომისიის მორიგი სხდომა იმართებოდა ბაქო.

დავით გარეჯის უდაბნოს მონასტრამდე მისასვლელი გზა 4-დღიანი ჩაკეტვის შემდეგ გასულ თვეში დროებით გაიხსნა.

საგარეო საქმეთა სამინისტროს განცხადებით, სადელიმიტაციო კომისიის სხდომაზე ყველა შეუთანხმებელი მონაკვეთი განიხილეს. სხდომის შედეგების თანახმად, მხარეები სახელმწიფო საზღვრის შეუთანხმებელი მონაკვეთების ერთობლივად დაათვალიერებენ. გარდა ამისა, ისინი მომავალ შეხვედრასაც გამართავენ, რომლიც თარიღიც ჯერ შეთანხმებული არ არის.

ამავე თემაზე: