გოგო, რომელიც ლექტორს სექსუალურ შევიწროებაში ადანაშაულებს, ამბობს, რომ მისი გადადგმული ნაბიჯი სხვა სტუდენტებს დაეხმარება, მათაც ილაპარაკონ. მისი თქმით, მას მანამდეც გაგებული ჰქონდა სხვა სტუდენტებისგან, თუმცა სანამ უშუალო შეხება არ ჰქონდა, ჭორი ეგონა.

"მე ვიცოდი და სხვებმაც იცოდნენ, რომ ასეთი რამ ამ კაცისგან მოდიოდა, მაგრამ ეშინოდათ ბულინგის და გამტყუვნების. ახლა შანსი მიეცეთ და ხმა ამოიღონ და თქვან. დაიწყო უკვე "ნამიოკები" სტუდენტების მხრიდან", — ამბობს ის.

მისი თქმით, ლექტორი ყველა შემთხვევაში იდენტურად იქცეოდა, ინტერესდებოდა სტუდენტის კავშირებით და შემდეგ იწყებდა მიმოწერას. თუმცა ამბობს, რომ უნივერსიტეტში ყოფნის დროს თავშეკავებული იყო.

"ჯერ არკვევდა, ზურგი ჰქონდა თუ არა გამაგრებული მსხვერპლს, თუ არა. [ჩემს შემთხვევაში ვერ დაინახა და ამიტომ გადაწყვიტა] მე ასე ვფიქრობ... იყო შემთხვევა, ჯგუფელს, რომელიც ისეთ სამსახურში მუშაობს, რომ უკან დაიხია და შემოიფარგლა მხოლოდ თავდაჭერილი კომპლიმენტით", — განმარტავს სტუდენტი.

სტუდენტმა ლექტორი სექსუალური ხასიათის მიმოწერასა და შევიწროებაში გამოცემა ბათუმელებთან დაადანაშაულა. გამოცემის ცნობით, სტუდენტი ამბობს, რომ მას ამის დამადასტურებელი მიმოწერა და ფოტოსურათები აქვს.

შინაგან საქმეთა სამინისტრომ გამოძიება სისხლის სამართლის კოდექსის 150-ე მუხლით დაიწყო, რაც იძულებას გულისხმობს. ლექტორს ბათუმის შოთა რუსთაველის სახელობის სახელმწიფო უნივერსიტეტმა სტუდენტებთან სააუდიტორიო საქმიანობა დროებით შეუჩერა.