ნაციონალური მოძრაობის ვაკის მაჟორიტარობის კანდიდატი, ელენე ხოშტარია მიიჩნევს, რომ პრემიერმინისტრის გაეროში გამოსვლა და საქართველოს სასამართლო სისტემაზე მისი კომენტარი ფარისევლობა და სიცრუეა:

"ძალიან მნიშვნელოვანია იმისთვის, რომ შედეგი მივიღოთ გაეროს ან სხვა მნიშვნელოვან ტრიბუნებზე, რომ ჩვენი ქვეყნის შიგნით რაც ხდება რეალურად, რასაც ვაკეთებთ და ვლაპარაკობთ, ჩვენი ორმხრივი ურთიერთობები საერთაშორისო არენაზე, იყოს თანმიმდევრული და მწყობრი. წარმოუდგენელია, რომ შიგნით აკეთებდე ერთს და შემდეგ გამოხვიდე გაეროზე და თქვა, რომ ყველაფერი კარგადაა. რაც არ უნდა ლამაზად ვისაუბროთ მართლმსაჯულების რეფორმაზე, როცა საქართველოში, მაგალითად, საკონსტიტუციო სასამართლოს სრული პარალიზება ხდება, მოსამართლეებზე შანტაჟის გზით, ცხადია ეს არის ფარისევლობა, რადგან საერთაშორისო საზოგადოება ხედავს ისინი ადევნებენ თვალყურს საქართველოში მოვლენებს".

თავისუფალი დემოკრატების წევრი, ვიქტორ დოლიძე კი განმარტავს, რომ გიორგი კვირიკაშვილის მიერ გაკეთებული აქცენტები სწორი იყო, თუმცა ამბობს:

"რეალობა რა ხდება საქართველოში განსაკუთრებთ მართლმსაჯულების კუთხით, ვინ და თავისუფალმა დემოკრატებმა კარგად ვიცით, იმიტომ რომ მხრებზე გადავიტანეთ ეს ყველაფერი. ამიტომ ეს არის სერიოზულად გამოსასწორებელი, ეპოქალური რეფორმა უნდა განხორციელდეს საქართველოში".

დღეს გაეროს გენერალური ასამბლეის 71-ე სესიაზე საქართველოს პრემიერმინისტრი გიორგი კვირიკაშვილი სიტყვით გამოვიდა, მოხსენების ერთ-ერთი მთავარი თემა ქვეყანაში მოახლოებული არჩევნები იყო. თუმცა პრემიერმინისტრი სხვა მნიშვნელოვან საკითხებსაც შეეხო.