მალხაზ მაჩალიკაშვილი სახელმწიფო უსაფრთხოების სამსახურში დაკითხვაზე მივიდა. შესვლამდე მაჩალიკაშვილმა განაცხადა, რომ დაკავების მოლოდინი არ აქვს, რადან დანაშაული არ ჩაუდენია და არც დანაშაულის მცდელობა ყოფილა.

"დასაკავებელი ამათი რამდენიმე ადამიანი ზის ჩემზე წინ, ვისაც დაუშავებია ჩემს წინაშე, ერის და მთელი საქართველოს, მთელი ქისტი მოსახლეობის წინაშე. პირსისხლიანი, სისხლში გასვრილი ხელებით აქ სხედან", - განაცხადა მან.

მაჩალიკაშვილმა არ უარყო, მაგრამ არც დაადასტურა ის ფაქტი, რომ მისი ძმიშვილი მორის მაჩალიკაშვილი იმყოფებოდა სოფელ მაჩხაანში, სადაც ჩანაწერის მიხედვით სავარაუდო ტერაქტი იგეგმებოდა. მისი თქმით, ამის შესახებ მაშინ ისაუბრებს, როცა კადრებს ნახავს.

"თუ იცოდნენ ჩასულები იყვნენ, თუ იცოდნენ გეგმავდნენ, მაშინ იქამდე სად იყვნენ ორი თვის განმავლობაში. მცდელობა თუ იყო სად იყვნენ? თუ ვგეგმავდით მაშინ იმ ფაქტს დალოდებოდნენ, რომ ფაქტზე დაეჭირათ", - განაცხადა მან.

მაჩალიკაშვილის ადვოკატმა, მარიამ კუბლაშვილმა განაცხადა, რომ გამორიცხული არ არის მისი დაცვის ქვეშ მყოფი დააკავონ. თუმცა, მისი თქმით, იმ მტკიცებულებების გათვალისწინებით, რაზეც მას აქვს ინფორმაცია მაჩალიკაშვილის დაკავება მოსალოდნელი არ არის.

კუბლაშვილმა უარყო გავრცელებული ინფორმაცია იმის შესახებ, რომ ამ ეტაპზე მაჩალიკაშვილის დაკითხვა მაგისტრი მოსამართლის თანდასწრებით სურთ. მან განმარტა, რომ კანონი ამ ფორმით მხოლოდ მხარის დაკითხვის უფლებას იძლევა, მაჩალიკაშვილი კი ჯერ მოწმეა და მას ბრალი წაყენებული არ აქვს. მისი თქმით, ბრალის წაყენების შემთხვევაში ამ ფორმატით დაკითხვას მოითხოვენ, რადგან მეტად გამჭვირვალე პროცესია.

ფარული ჩანაწერი სავარაუდო ტერაქტზე

7 მაისს სახელმწიფო უსაფრთხოების სამსახურმა ბრიფინგზე განაცხადა, რომ პანკისის სპეცოპერაციის დროს მოკლული თემირლან მაჩალიკაშვილის მამას, მალხაზ მაჩალიკაშვილს ტერორისტული აქტის ორგანიზების გზით რამდენიმე პირის მკვლელობის განზრახვა ჰქონდა. უწყება ამტკიცებს, რომ მაჩალიკაშვილი ტერორისტული აქტის ჩადენას სუს-ის უფროსის ყოფილი მოადგილის, სოსო გოგაშვილის მიმართ აპირებდა.

მოდულის შენობაში დაკითხვაზე იყო მალხაზ მაჩალიკაშვილის ძმისშვილი, მორის მაჩალიკაშვილის, რომელიც სუს-ის მტკიცებით, მალხაზ მაჩალიკაშვილის გეგმის მიხედვით, ჩართული უნდა ყოფილიყო აღნიშნული ტერორისტული აქტის განხორციელებაში. უწყებამ მათი საუბრის ჩანაწერი გაასაჯაროვა.

მაჩალიკაშვილის ყველა ბრალდებას უარყოფს და ამბობს, რომ ამით მისი ოჯახის განადგურებას ცდილობენ. ის ამბობს, რომ კარავში რჩება, ბრძოლას გააგრძელებს და თუ დამნაშავეა, მზადაა დააკავონ.

"თუ მე საშიში ვარ ამ ქვეყნისთვის, თუ მე ტერორისტი ვარ რატომ არ მაკავებენ ამდენი ხანი? 2 თვის წინ სადღაც გამწარების დროს ნათქვამი და ჩაწერილი სიტყვების გამო დღეს ტერორისტს მეძახიან. რატომ არ წამასწრეს დანაშაულზე და არ დამაკავეს, თუ ტერორისტი ვარ? კი მე სულ მაქვს სურვილი გავიგო იმ ადამიანების შესახებ მეტი ვინც შვილი მომიკლეს. მაგრამ ეს დანაშაულის ჩადენაა?" — აცხადებს მალხაზ მაჩალიკაშვილი.

ამავე თემაზე:

• გოგაშვილი: ზოგიერთი პოლიტიკოსი, არასამთავრობო და ვითომ ჟურნალისტი მაჩალიკაშვილს დანაშაულისთვის ამზადებდა
• პროკურატურა: მაჩალიკაშვილის საქმეზე შემაჯამებელი გადაწყვეტილებისთვის მტკიცებულებებს ვაფასებთ
• ადვოკატი: მაჩალიკაშვილების დაკავების საფუძველი არ არსებობს
• ყველაფერს აკეთებენ, რომ გამანადგურონ — მალხაზ მაჩალიკაშვილი