საქართველოდან საფრანგეთში თავშესაფრის მაძიებელთა რიცხვის გაზრდის გამო ორივე ქვეყნის შინაგან საქმეთა სამინისტრომ სპეციალური ზომები შეიმუშავა. როგორც დღეს გამართულ ერთობლივ პრესკონფერენციაზე საქართველოს შს მინისტრმა, გიორგი გახარიამ განაცხადა, გაფრენამდე საქართველოში საიმიგრაციო კონტროლი გამკაცრდება.

გახარიას თქმით, საფრანგეთიდან საქართველოში და პირიქით, გაიგზავნებიან საიმიგრაციო სამახურის წარმომადგენლები. ისინი იმუშავებენ ყველა იმ ქალაქში, რომელშიც საქართველოდან პირდაპირი ფრენები ხორციელდება. მათ შორის, პარიზსა და ლიონში. მინისტრის განმარტებით, ეს ზომები საჭიროა იმისთვის, რომ წინასწარ მოხდეს რისკების შეფასება თავშესაფრის მოთხოვნის საკითხებზე.

"ჩვენს ფრანგ კოლეგებს, ძალიან კარგად ესმით, ჩვენი ქვეყნის დემოკრატიის განვითარებისთვის რას ნიშნავს ეს მიღწევა. არც ერთ შემთხვევაში, ეს მიღწევა არ დგას კითხვის ნიშნის ქვეშ, თუმცა მოითხოვს ჩვენი მხრიდან გარკვეული, კონკრეტული ნაბიჯების გადადგმას", — განაცხადა გახარიამ.

აქამდე შინაგან საქმეთა სამინისტროს გადაწყვეტილებით, ქუთაისიდან პარიზის მიმართულებით ფრენებზე კონტროლი იყო გამკაცრებული. კერძოდ, ქუთაისის აეროპორტში გაფრენამდე მგზავრებს ქართველი მესაზღვრეები ამოწმებდნენ.

თავშესაფრის მაძიებელთა რიცხვის ზრდაზე ისაუბრა საფრანგეთის შს მინისტრმაც. კასტანერმა განაცხადა, რომ საქართველოში არ არის ომი და მიიჩნევა მშვიდობიან ქვეყანად, შესაბამისად "არ არის ნორმალური" ერთ-ერთი პირველი იყოს თავშესაფრის მოთხოვნის თვალსაზრისით. მისი თქმით, ზოგიერთი მიგრანტი საფრანგეთში სამკურნალოდ ჩადის მიუხედავად იმისა, რომ იმავე მკურნალობის მიღება საქართველოშიც შეუძლია. მისივე თქმით, ამიერიდან საფრანგეთი მხოლოდ იმათ მიიღებს, ვისაც რეალურად სჭირდება დახმარება.