ოდრი ჰეპბერნი ერთ-ერთ ყველაზე ლამაზ ქალადაა დღემდე მიჩნეული, თუმცა, როგორც მისი შვილი ამბობს, ოდრის არ მოსწონდა საკუთარი ფეხები და ცხვირი და წონითაც უკმაყოფილო იყო.

"მან იცოდა, რომ ადამიანებს ის ლამაზ ქალად მიაჩნდათ, თუმცა საკუთარ თავს ასეთად ვერ ხედავდა. ის დარწმუნებული იყო იმაში, რომ ზედმეტი სიგამხდრის გამო არც ისე ლამაზი ცხვირი და ფეხები ჰქონდა. რა თქმა უნდა, მე მას როგორც დედას, ისე ვუყურებდი. ამ დროს მას გარეგნობით ვერ აფასებ", — ამბობს ლუკა დოტი The Lady-სთან.

ის დასძენს, რომ ოდრი თავისი სიბერით ძალიან ბედნიერი იყო და ცხოვრებას სეზონებად ჰყოფდა: ახალგაზრდობის პერიოდად, დედობაც და სიბერედ.

"ასაკში შესვლასთან ერთად, ის თავის გარეგნობას იცვლიდა. მიიჩნევდა, რომ ახალგაზრდული ვარცხნილობის ქონა აღარ შეეძლო. თუმცა მიმართავდა ხრიკებს, თმას უკან იკრავდა, რაც მის ნაოჭებს ალამაზებდა", — ამბობს ის.

ფოტო: Mark Shaw / mptvimages.com

"დედის სიკვდილამდე მე და ჩემი ძმა ვერ ვაცნობიერებდით მის საკულტო ხატს. მას ყოველთვის იმაზე ერჩივნა ლაპარაკი, თუ როგორ მიდიოდა ჩვენი საქმეები სკოლაში, რა ხდებოდა შეყვარებულებთან, რა პრობლემები გვქონდა. ამიტომაც აღვიქვამდით მას, როგორც დედას", — განაგრძობს ლუკა.

ოდრის შვილის თქმით, გარდაცვალების შემდეგ, მისმა ოჯახმა ორმაგი დარტყმა მიიღო:

"სევდა, რომელსაც განვიცდიდით, პირადი უნდა ყოფილიყო, მაგრამ, ამავდროულად, მისი ფოტოები უამრავი ჟურნალის გარეკანზე იბეჭდებოდა. ეს ჩვენთვის ნამდვილი შოკი იყო. ყველას უნდოდა, მის შესახებ რამე სცოდნოდა. მაშინ მომიწია იმის გააზრება, რომ ის საჯარო ფიგურა იყო".

ფოტო: Gstatic.com

დოტი იხსენებს, რომ მის შვილს ფილმის "საუზმე ტიფანისთან" ღია ბარათი ჰქონდა და არ იცოდა, რომ მასზე გამოსახული ქალი მისი ბებია იყო:

"ვუთხარი, რომ ოდრი მისი ბებია იყო, თუმცა არა მისი ნამდვილი ბებია, რადგან მსურდა მისი გლამურული ფიგურა ნამდვილი პიროვნებიდან განმეცალკევებინა.

"დედა დედაა. სახლში ის ჯინსებს და მაისურს ატარებდა, რაც გასაკვირია, იმიტომ, რომ ხალხს ის მუდმივად მოდური ეგონა. ჟივენში და ვალენტინო დედაჩემის მეგობრები იყვნენ, მაგრამ ეს მნიშვნელოვან რამედ არასდროს მიგვაჩნდა. როდესაც ჟივენში გვსტუმრობდა, უბრალოდ კარგად მოქცევასა და მოკრძალებულად ჭამას ვცდილობით", - ამბობს ის.

ორი ოსკარის მფლობელი ვარსკვლავი 63 წლის ასაკში, 1993 წელს გარდაიცვალა.