მაჩალკაშვილების ოჯახის ადვოკატი, მარიამ კუბლაშვილი ამბობს, რომ მისი დაცვის ქვეშ მყოფების დაკავების ან ბრალის წარდგენის საფუძველი არ არსებობს. კუბლაშვილი დღეს მალხაზ მაჩალიკაშვილის ძმისშვილთან, მორის მაჩალიკაშვილთან ერთად სუს-ში დაკითხვაზე იმყოფებოდა.

მოდულის შენობიდან მარიამ კუბლაშვილმა პარლამენტთან გადაინაცვლა, სადაც დაკითხვაზე კიდევ ერთხელ ისაუბრა. მისი თქმით, ის საქმეზე ვერ ისაუბრებს, რადგან მასალები გასაიდუმლოებულია. კუბლაშვილი ამბობს, რომ სუს-ის ბრიფინგი დაკითხვას, სავარაუდოდ, მიზანმიმართულად დაემთხვა.

"როდესაც ასე ამგვარად ახმაურებენ და ამგვარად ხდება ინფორმაციის საზოგადოებისთვის მიწოდება, მაგ შემთხვევაში ნაკლები მტკიცებულება აქვთ, მტკიცებულებათა ერთობის სტანდარტი არ არის საკმარისი იმისთვის, რომ ბრალი იქნას წაყენებული და დანაშაულის კვალიფიკაცია მოხდეს. ეს არის მიზანმიმართული მტკიცებულება მალხაზ მაჩალიკაშვილის დისკრედიტაციისთვის. ამხელა უწყებას მტკიცებულებები არ გამოაქვს და არ ლაპარაკობს წინასწარ მტკიცებულებებზე, რომელზეც ჯერ ბრალი არ არსებობს", — აღნიშნა მარიმ კუბლაშვილმა.

რაც შეეხება მალხაზ მაჩალიკაშვილს ის დაკითხვაზე დღეს, 7 მაისს იყო დაბარებული, თუმცა არ გამოცხადდა. კუბლაშვილი ამბობს, რომ მაჩალიკაშვილის არ გამოცხადება მის ჯანმრთელობის მდგომარეობას უკავშირდება, რადგან დაკითვისას მედიკამენტების მოწოდება ვერ მოხერხდება. თვითონ მალხაზ მაჩალიკაშვილი ყველა ბრალდებას უარყოფს და ამბობს, სახელმწიფო მის გასანადგურებლად ყველა მეთოდს იყენებს.

სუს-ის განცხადებით, პანკისის სპეცოპერაციის დროს მოკლული თემირლან მაჩალიკაშვილის მამას, მალხაზ მაჩალიკაშვილს ტერორისტული აქტის ორგანიზების გზით რამდენიმე პირის მკვლელობის განზრახვა ჰქონდა. უწყება ამტკიცებს, რომ მაჩალიკაშვილი ტერორისტული აქტის ჩადენას სუს-ის უფროსის ყოფილი მოადგილის, სოსო გოგაშვილის მიმართ აპირებდა.

მოდულის შენობაში დაკითხვაზე იყო მალხაზ მაჩალიკაშვილის ძმისშვილი, მორის მაჩალიკაშვილის, რომელიც სუს-ის მტკიცებით, მალხაზ მაჩალიკაშვილის გეგმის მიხედვით, ჩართული უნდა ყოფილიყო აღნიშნული ტერორისტული აქტის განხორციელებაში. უწყებამ მათი საუბრის ჩანაწერი გაასაჯაროვა.

"ტერორისტული აქტის ჩადენა იგეგმებოდა დედოფლისწყაროს რაიონის სოფელ ზემო მაჩხაანში, სახელმწიფო უსაფრთხოების სამსახურის უფროსის ყოფილი პირველი მოადგილის, იოსებ გოგაშვილის მამის საფლავზე, იოსებ გოგაშვილის და მისი თანმხლები პირების მისვლის დროს, რასაც მოჰყვებოდა მათი და სხვა მოქალაქეთა სიცოცხლის ხელყოფა", — აცხადებენ უწყებაში.

სუს-ის ინფორმაციით, 2019 წლის 23 მარტს უშუალოდ მალხაზ მაჩალიკაშვილმა მისცა მითითება მორის მაჩალიკაშვილს, რათა ეს უკანასკნელი ჩამოშორებულიყო ყველა სხვა საქმიანობას და ემუშავა მხოლოდ ერთ პიროვნებაზე — იოსებ გოგაშვილზე. უწყების მტკიცებით, მორის მაჩალიკაშვილს უნდა დაედგინა იოსებ გოგაშვილის საცხოვრებელი მისამართები, გადაადგილების მარშრუტები და, აგრეთვე, გამგზავრებულიყო სოფელ ზემო მაჩხაანში სასაფლაოზე, რათა დაედგინა იოსებ გოგაშვილის მამის საფლავის ადგილმდებარეობა და გადაეღო ფოტოები, ხოლო მოპოვებული ინფორმაციის საფუძველზე მალხაზ მაჩალიკაშვილი დაგეგმავდა სხვა ქმედებებს.

უწყების განმარტებით, საქმეზე გამოძიების დაწყებას საფუძვლად დაედო თბილისში პარლამენტის შენობის წინ მიმდინარე საპროტესტო აქციაზე, 2018 წლის 31 მაისს მალხაზ მაჩალიკაშვილის მიერ საჯაროდ გაკეთებული მუქარის შემცველი განცხადება, რომლის თანახმადაც იგი და მასთან მყოფი პირები, რომლებსაც, მალხაზ მაჩალიკაშვილის განცხადებით ფიცი ჰქონდათ მიცემული, მზად იყვნენ, შეეღწიათ საქართველოს სახელმწიფო უსაფრთხოების სამსახურის შენობაში და თავი აეფეთქებინათ.

გამოძიება მიმდინარეობს ტერორისტული აქტის მომზადების და ტერორისტული მიზნით ცეცხლსასროლი იარაღის ან/და ასაფეთქებელი მოწყობილობის მართლსაწინააღმდეგო შეძენა-შენახვის ფაქტებზე, დანაშაული გათვალისწინებული საქართველოს სსკ-ის 18-323-ე და 323¹ მუხლებით.