საქართველოს პატრიოტთა ალიანსმა პარლამენტის ეთიკის საბჭოს წევრად ემზარ კვიციანი წარადგინა. შესაბამისი მიმართვა პარლამენტის ბიუროს სხდომაზე გუშინ დარეგისტრირდა.

ემზარ კვიციანი დეპუტატებს შორის დისკრიმინაციული და ჰომოფობიური განცხადებებით გამოირჩევა. ამავე შინაარსის იყო მისი ზოგიერთი კანონპროექტიც, მათ შორისაა ნიქაბისა და ბურქის ტარების აკრძალვა, რელიგიური გრძნობების შეურაცხყოფის შესახებ ინიციატივა.

დეპუტატს პარლამენტის პლენარულ სხდომათა დარბაზში პარლამენტის ვიცე-სპიკერმა თამარ ჩუგოშვილმა დისკრიმინაციული კანონპროექტის წარდგენის გამო მიკროფონიც გამოურთო. საუბარია ინიციატივაზე, რომლითაც კვიციანი კანონიდან ტერმინების — "სექსუალური ორიენტაცია" და "გენდერული იდენტობის" ამოღებას ითხოვა.

პატრიოტთა ალიანსის კიდევ ერთმა დეპუტატმა ადა მარშანიამ მოითხოვა, რომ თამარ ჩუგოშვილის მიერ კვიციანისთვის მიკროფონის გამორთვა ეთიკის საბჭომ განიხილოს.

ეთიკის საბჭო ეთიკის კოდექსის აღსრულების მექანიზმია. ის 14 წევრისგან უნდა დაკომპლექტდეს. მათ შორის 7 ადგილი ქართულ ოცნებას ეკუთვნის, 3 — ევროპულ საქართველოს, ერთი პატრიოტთა ალიანსს, ხოლო ორი დამოუკიდებელ დეპუტატებს. ეთიკის საბჭომ უნდა განიხილოს საჩივრები ეთიკის კოდექსის სავარაუდო დარღვევის შესახებ და დარღვევის დადასტურების შემთხვევაში ინფორმაცია პარლამენტის ვებგვერდზე უნდა გამოაქვეყნოს. ასევე, ამ საბჭოს ვალდებულებაა რეკომენდაციების გაცემაც.

გაიგეთ მეტი: რა ეთიკურ ნორმებს უნდა იცავდეს დეპუტატი — კანონპროექტი მოკლედ