თავისუფალი დემოკრატების წევრი, ალუდა გოგლიჩიძე On.ge-სთან საუბარში განმარტავს, რომ პარტიის გამარჯვების შემთხვევაში, სტუდენტური თვითმმართველობა იმ ფორმით, რა ფორმითაც დღეს ეს ინსტიტუცია არსებობს, აუცილებლად გადაიხედება.

მისი თქმით, განათლებაზე გამოყოფილი ბიუჯეტი 400 მილიონი ლარით გაიზრდება. ამასთან, ის ამბობს, რომ ყველა პროფესიისა და ყველა პროფილის სტუდენტი ერთი და იმავე გრანტის მოცულობით არ დაფინანსდება:

"სხვადასხვა სპეციალობის კადრის მომზადებას სხვადასხვა ხარჯები სჭირდება და ეს დიფერენცირებული უნდა იყოს, ხოლო დაფინანსება - საჭიროებებზე მორგებული. ამასთან, უნდა არსებობდეს სოციალური გრანტებიც”.

რაც შეეხება სასკოლო განათლებას, გოგლიჩიძე განმარტავს, რომ ერთ მოსწავლეზე დაფინანსების ფორმულა უნდა დაიხვეწოს და სისტემაში ადგილობრივი თვითმმართველობის როლი გაიზარდოს.

ის ასევე ამბობს, რომ უნდა დაიხვეწოს როგორც მასწავლებლების მომზადების, მათი კარიერაში შეყვანის, ისე პროფესიული ზრდის და კარიერიდან გამოსვლის ყველა ნიუანსი და პროცედურა:

“სისტემამ ახალი კადრების მოზიდვა უნდა შეძლოს და პენსიონერი პედაგოგების ღირსეული დატოვება, გასვლა სისტემიდან. დღეს ბევრი პედაგოგი ვერ გადის პენსიაში, რადგან მისი სოციალური მდგომარეობა უარესდება. მასწავლებლების ხელფასები სულ მცირე საჯარო მოხელის ხელფასს უნდა გაუტოლდეს, როგორც ვიცი, ეს თანხა 800 ლარზე ცოტა მეტია”.

ვრცლად პოლიტიკური სუბიექტების საარჩევნო პროგრამების შესახებ ინფორმაცია შეგიძლიათ იხილოთ აქ:

პარტიების დაპირებები და ხედვა განათლების სისტემის შესაცვლელად