საია წინასაარჩევნო მონიტორინგს აგრძელებს, არჩევნებამდე პერიოდში გამოკვეთილ დარღვევებსა და ტენდენციებზე საუბრობს და სხვადასხვა უწყებას შესაბამისი რეაგირებისკენ მოუწოდებს.

ორგანიზაციის მიერ გავრცელებულ შესაძლო დარღვევათა ნუსხაშია: ქართული ოცნების აღმასრულებელი მდივნის, ირაკლი კობახიძის მიერ ენმ-ს პროვოკაციებში დადანაშაულება, ირაკლი ოქრუაშვილის საინიციატივო ჯგუფის წარმომადგენლების მიერ მოსახლეობისთვის საკვები პროდუქტების დარიგება, ეროვნული ფორუმის წარმომადგენლების მიერ ფოთის ქუჩებში გავრცელებული ფლაერები, რომლითაც პარტია ახალგაზრდებს გასართობ ღონისძიებებში უფასოდ მონაწილეობის მისაღებად იწვევს:

"სხვადასხვა წყაროებიდან მიღებული ინფორმაციის თანახმად, პოლიტიკური პარტიების წარმომადგენლები აწარმოებენ ამომრჩეველთა პირადი მონაცემების აღრიცხვას, თუმცა ისინი არ განმარტავენ აღნიშნული მონაცემების შეგროვების მიზანს. მნიშვნელოვანია ის ფაქტი, რომ ამ პირების სამიზნე ჯგუფებს წარმოადგენენ სოციალურად დაუცველი, ეთნიკური უმცირესობების წარმომადგენელი და დევნილი მოქალაქეები. სახელი, გვარი და პირადი ნომერი პირის პერსონალურ ინფორმაციას წარმოადგენს და მისი დამუშავება დასაშვებია, თუ არსებობს მონაცემთა სუბიექტის თანხმობა.

პერსონალური მონაცემების შეგროვება წარმოადგენს ამომრჩევლის ნებაზე არაპირდაპირი ზემოქმედების განხორციელების საფრთხის შემცველ ტენდენციას, რაც განსაკუთრებით მნიშვნელოვანია მაშინ, როდესაც მონაცემთა სუბიექტები სოციალურად დაუცველი, ეთნიკური უმცირესობების წარმომადგენელი და დევნილი მოქალაქეები არია".

გარდა ამისა, ორგანიზაცია ამბობს, რომ მისივე მონიტორებისათვის მიწოდებული ინფორმაციის თანახმად, სამეგრელოში ადგილობრივი თვითმმართველობის წარმომადგენელმა ერთ-ერთი ა(ა)იპ სამსახურის ყველა თანამშრომელს 2016 წლის 8 ოქტომბრის საპარლამენტო არჩევნებზე 10-10 მხარდამჭერი ამომრჩევლის მიყვანა, ხოლო მანამდე კი ამ ადამიანების პარადობის მოწმობების ასლების მიტანა დაავალა.

საარჩევნო პროცესის თავისუფალ გარემოში ჩატარების მიზნით, სიაა მიმართავს შსს-ს, აუდიტის სამსახურსა და საარჩევნო ადმინისტრაციას, თავისუფალი და სამართლიანი არჩევნებისათვის უწყებათაშორის კომისიას, ადგილობრივი თვითმმართველობის წარმომადგენლებს, პერსონალურ მონაცემთა დაცვის ინსპექტორს, საარჩევნო სუბიექტებს, პარტიების წარმომადგენლებსა და აქტივისტებს ზემოაღნიშნულ შესაძლო დარღვევებთან დაკავშირებით, მათი უწყების კომპეტენციის შესაბამისი რეაგირება მოახდინონ.

საია ასევე აფრთხილებს მოქალაქეებს, რომ მათ უფლება გაქვთ, არ გასცენ საკუთარი პერსონალური მონაცემები, ხოლო პოლიტიკური პარტიების წარმომადგენლებს, საჯარო მოხელეებს არ აქვთ უფლება, აიძულონ მათ ამგვარი ინფორმაციის გაცემა.