ბავშვებით ვაჭრობის საქმის პროკურორი, თეა გიორგაძე აცხადებს, რომ საქართველოში ჩამოსვლამდე ერთი ბავშვის გაყიდვასაც ჰქონდა ადგილი. მისივე თქმით, გაყიდვის ფაქტზე ეჭვებს ისიც ამძაფრებს, რომ გარდაცვალების მომენტში ბავშვი 9 თვის უნდა ყოფილიყო და "წარმოუდგენელია ის სააბაზანოში მარტო ყოფილიყო".

პროკურორი ასევე აცხადებს, რომ დაცვის მხარის მიერ წარმოდგენილი დოკუმენტები, რომლითაც მე-11 ბავშვი აბანოში დაიხრჩო, გაყალბებულია.

"მიმდინარეობს გამოძიება, ეს არ არის მხოლოდ საქართველოში ჩადენილი დანაშაული. ბრალდებულის მხრიდან ადგილი ჰქონდა არასრულწლოვნების გადაყვანას ერთი ქვეყნიდან მეორე ქვეყანაში. საქართველოში ჩამოსვლამდე ერთი ბავშვის გაყიდვასაც ჰქონდა ადგილი. ბრალდების მხარე დასაბუთებული ვარაუდის სტანდარტით დადგენილად მიიჩნევს, რომ ეს ფაქტი მოხდა. გარდაცვალების მოწმობა არ არსებობს. დაცვის მხარემ წარმოადგინა დასკანერებული ფურცელი, სადაც მითითებულია, რომ არასრულწლოვანი, 9 თვის ბავშვი გარდაიცვალა აბაზანაში ბანაობის დროს, რაც ეჭვის საფუძველს ნამდვილად ქმნის", — განაცხადა პროკურორმა.

ტრეფიკინგის საქმე

ტრეფიკინგში ბრალდებულ უკრაინელ ქალს, იულია სუსლიაკს, რომელიც მოსკოვიდან საქართველოში 10 ბავშვით ჩამოვიდა, აღმკვეთი ღონისძიების სახით პატიმრობა შეეფარდა. გადაწყვეტილება თბილისის საქალაქო სასამართლოში დღეს გამოცხადდა.

პროცესი დახურულ რეჟიმში წარიმართა. სხდომის დახურვის მოტივი ბავშვების შესახებ პერსონალური ინფორმაცია გახდა. პატიმრობის შუამდგომლობა ბრალდების მხარემ დააყენა დაცვის მხარე კი ბრადებულის გათავისუფლებას ითხოვდა. ადვოკატის ცნობით, საქმეში ტრეფიკინგის მტიცებულება არ არის.

1982 წელს დაბადებულ უკრაინის მოქალაქე იულია სუსლიაკს არასრულწლოვნით ვაჭრობა (ტრეფიკინგი) ედება ბრალად. დაკავებული წარდგენილ ბრალს არ აღიარებს და აცხადებს, რომ ათივე ბავშვი მისი შვილია.

ბრალდებული, მიმდინარე წლის 25 აპრილს, ქუთაისის ერთ-ერთ საავადმყოფოში დააკავეს. შინაგან საქმეთა სამინისტროს ინფორმაციით, იულია სუსლიაკი საქართველოში 10 მცირეწლოვან ბავშვთან ერთად რუსეთიდან 2019 წლის 8 აპრილს ჩამოვიდა და აფხაზეთის ოკუპირებულ ტერიტორიაზე გადასვლას აპირებდა.

საგამოძიებო უწყებაში აცხადებენ, რომ დოკუმენტაციის მიხედვით, 10-ვე ბავშვი იულია სუსლიაკის შვილია და მის გვარს ატარებს, თუმცა მცირეწლოვნებიდან 4 დაბადებულია 2017 წელს, რამაც სამართალდამცველებს ტრეფიკინგის ეჭვი გაუჩინა. როგორც ბრალდებულის ადვოკატი ზურაბ თოდუა განმარტავს, 4 ბავშვი იულია სუსლიაკის ბიოლოგიური შვილია, ხოლო დანარჩენი 6 კი სუროგაციის გზით გაჩნდა.

შსს-ს ცნობით, იულია სუსლიაკი უკრაინიდან რუსეთში 11 ბავშვის თანხლებით გადავიდა, საქართველოში კი 10 ბავშვი ჩამოიყვანა. შინაგან საქმეთა სამინისტრო ინტერპოლის არხებით ცდილობს მოიძიოს ინფორმაცია იმ ერთი ბავშვის შესახებ, რომელიც ამ დრომდე არ ჩანს. დაკავებულის ადვოკატი აცხადებს, რომ ბავშვი გარდაცვლილია და ამის დამადასტურებელი დოკუმენტაციის წარდგენას სასამართლოში აპირებს.

გამოძიება ორი ან მეტი არასრულწლოვნით ვაჭრობის (ტრეფიკინგი) ფაქტზე, საქართველოს სსკ-ის 143-ე 2-პრიმა მუხლის მე-3 ნაწილის "გ" ქვეპუნქტით მიმდინარეობს. დანაშაული 14-დან 17 წლამდე ვადით თავისუფლების აღკვეთას ითვალისწინებს.

გაიგე მეტი: რა ვიცით ამ დროისთვის, სავარაუდოდ, ბავშვებით ვაჭრობის საქმეზე