შუალედურ არჩევნებამდე რამდენიმე კვირით ადრე საავტომობილო გზების დეპარტამენტმა ზუგდიდის ქუჩების რეაბილიტაცია დააანონსა. შესაბამისი ბრძანება მთავრობის ადმინისტრაციამ გასცა.

საავტომობილო გზების დეპარტამენტის ცნობით, სარეაბილიტაციო სამუშაოები მიმდინარეობს ქალაქ ზუგდიდის თამარ მეფის ქუჩის 2,3 კმ-იანი მონაკვეთზე.

განცხადებაში ვკითხულობთ, რომ წლის განმავლობაში დაგეგმილია ადგილობრივი მნიშვნელობის კონსტანტინე გამსახურდიას, თაბუკაშვილის, ჯანაშიას, ხელაიას, ზვიად გამსახურდიას, ლაზის, ჩიქობავას, ბარამიას და ქობულეთის ქუჩების სარეაბილიტაციო სამუშაოების დაწყება.

დეპარტამენტის ინფორმაციით, ქალაქ ზუგდიდის 9 ქუჩაზე სრულად მოწესრიგდება საგზაო ინფრასტრუქტურა და სანიაღვრე სისტემები.

საქართველოს აუდიტის სამსახურში On.ge-ს უთხრეს, რომ ამ საკითხს შეისწავლიან.

"სახელმწიფო აუდიტის სამსახური შეისწავლის ყველა ინფორმაციას, რომელიც შესაძლოა უკავშირდებოდეს წინასაარჩევნო კამპანიასთან დაკავშირებულ აქტივობებს და შემოწირულებებს. მსგავს შემთხვევაში, სახელმწიფო აუდიტის სამსახური სწავლობს, ღონისძიების დაგეგმვის პერიოდს და მიზნებს, რათა მოხდეს არჩევნებთან შესაძლო კავშირისა და კანონთან შესაბამისობის იდენტიფიცირება", — განაცხადეს აუდიტის სამსახურში.