პარლამენტის ვიცე-სპიკერი თამარ ჩუგოშვილი აცხადებს, რომ პანკისში მომხდარ მოვლენებზე არასწორია აზრია შექმნილ და მას გაუმართლებლად მიაჩნია მომხდარის გამართლება. მისი თქმით, არ შეიძლება იმის რომანტიზება რომ პოლიციას ქალები უშენდნენ ქვებს. მისივე თქმით, პანკისში არ ყოფილა მშვიდობიანი პროტესტი, რომელიც პოლიციამ დაარბია.

"მოხუცი ქალები ქვებს უშენდნენ ეს სენტიმენტიც არ არის სწორი ჩემი აზრით. იმიტომ, რომ ახლა თუ ყველაზე მეტი რაოდენობით ვინმე გვყავს დაზარალებული ესენი არიან პოლიციის თანამშრომლები. უმძიმეს მდგომარეობაში ბევრი მათგანი.", — განაცხადა ჩუგოშვილმა გადაცემა რეაქციის ეთერში.

ჩუგოშვილი ამბობს, რომ პროცესი უსაფრთხოების უზრუნველყოფის მიზნით მცირე ჯგუფით დაიწყო და "მძიმედ გაგრძელდა".

"შუალედში ჩვენ გამოვიარეთ 60 ჯანმრთელობადაზიანებული, უბედურ დღეში ჩაგდებული პოლიციელი, რომელიც უკაცრავად და თავს არავის არ დასხმია. რომელიც უკიდურესად მცირე ზომებს იყენებდა იმისთვის, რომ მეტი ზიანი არ მიყენებოდათ სხვებს", — აცხადებს ჩუგოშვილი.

დაპირისპირება პანკისი ხეობაში

21 აპრილის დილას პანკისის ხეობაში, სოფელ ბირკიანში აქციის მონაწილეებსა და პოლიციას შორის დაპირისპირება მოხდა. ადგილობრივებმა მდინარე ალაზანზე მშენებარე ჰესზე ტექნიკის შესვლა გააპროტესტეს, რასაც იქ მობილიზებულ პოლიციასთან დაპირისპირება მოყვა. როგორც შინაგან საქმეთა სამინისტროში განმარტეს, დილას სოფელში პოლიცია ეკონომიკის სამინისტროს მიმართვის საფუძველზე შეიყვანეს, სპეცდანიშნულების რაზმები კი დაპირისპირების გამო დაამატეს.

ჰესების საკითხზე სალაპარაკოდ თელავში მთავრობისა და ადგილორივების წარმომადგენლებს შორის შეხვედრა გაიმართა, თუმცა პარალელურად პანკისში ვითარება დაიძაბა. სპეცრაზმმა აქციის მონაწილეების წინააღმდეგ ორჯერ ცრემლსადენი გაზი და რეზინის ტყვიები გამოიყენა. ადგილობრივებმა კი პოლიციას ქვები და ხელკეტები დაუშინეს. შსს-ს განცახდებით, შედეგად დაშავდა 55 ადამიანი, მათ შორის 38 სამართალდამცავი.

რამდენიმე საათში შემთხვევის ადგილას მთავრობის წარმომადგენლები ჩავიდნენ. შინაგან საქმეთა მინისტრმა, გიორგი გახარიამ თემის უხუცესებთან შეხვედრის შემდეგ განაცხადა, რომ ჰესი მანამ არ აშენდება, სანამ მოსახლეობის 90%-ს არ ექნება ამის სურვილი.

მთავრობის ადმინისტრაციამ დაპირისპირების შემდეგ განცხადება გაავრცელა, რომელშიც ჰესების სარგებლიანობაზე ისაუბრეს. მათი თქმით, საჭირო იყო ამ ინფორმაციის ადგილობრივებისთვის მიწოდება.