მოძრაობა პაატა ბურჭულაძე - სახელმწიფო ხალხისთვის წარმომადგენელი, ვახტანგ მეგრელიშვილი On.ge-სთან საუბარში განმარტავს, რომ საარჩევნო სუბიექტს, გამარჯვების შემთხვევაში, თსუ-სთან დაკავშირებით კონკრეტული გეგმები არ აქვს, მაგრამ სახელმწიფო უმაღლეს სასწავლებლებს მაქსიმალური ავტონომია უნდა მიენიჭოთ:

"არ მესმის, რატომ უნდა იყოს უმაღლეს სასწავლებელში ერთი თვითმმართველობა და რატომ არ შეიძლება არსებობდეს უამრავ ინტერესთა ჯგუფი, რომელიც გაერთიანებულია სხვადასხვა ინტერესის გარშემო. შესაბამისად, ეს მონოპოლიური მდგომარეობა, რომელსაც უმაღლესი განათლების შესახებ კანონი რომელიღაც კერძო ჯგუფს ანიჭებს, ქმნის იმ პრობლემას, რაც ვიხილეთ თსუ-ში".

მისი თქმით, საარჩევნო სუბიექტის გამარჯვების შემთხვევაში, საატესტატო და ერთიანი გამოცდები გაუქმდება და ამოქმედდება დაახლოებით ისეთი სისტემა, როგორიც განვითარებულ ქვეყნებში ფუნქციონირებს:

"საატესტატო გამოცდებს შინაარსი საერთოდ არ გააჩნია. იმისთვის, რომ უნივერსიტეტმა მიიღოს გადაწყვეტილება, მას უნდა ჰქონდეს მეტი თავისუფლება, ვიდრე დღეს აქვს. ასეთი გამოცდები წელიწადში უმეტეს ქვეყანაში 6-ჯერ ბარდება და არ ამოწმებს, რამდენი გაქვს გაზუთხული, არამედ ამოწმებს, რა უნარებს ფლობს ბავშვი".

ის ასევე განმარტავს, რომ სახელმწიფო უმაღლეს სასწავლებელში ჩარიცხულ იმ სტუდენტებს დააფინანსებს, რომელთა ოჯახებსაც სწავლის საფასურის გადახდის შესაძლებლობა არ აქვთ:

"თუ ისინი ჩაირიცხებიან უმაღლესში, სახელმწიფოს ამოცანაა გვერდზე დაუდგეს ასეთ სტუდენტებს და არა მათ, ვინც საუკეთესოდ ჩააბარებს. თუმცა თუ საუკეთესოდ ჩააბარა და ამავდროულად გაჭირვებულიცაა, ცხადია, ის სრულ დაფინანსებას მიიღებს”.

ვრცლად პოლიტიკური სუბიექტების საარჩევნო პროგრამების შესახებ ინფორმაცია შეგიძლიათ იხილოთ აქ:

პარტიების დაპირებები და ხედვა განათლების სისტემის შესაცვლელად