Black Sea Arena 2019 წლის საკურორტო სეზონის განმავლობაში სხვადასხვა კონცერტისა და ღონისძიების ჩატარებაში 6,5 მილიონი ლარის დახარჯვას გეგმავს. Check In Georgia-ს ფარგლებში გასამართი ღონისძიებების ტენდერის გარეშე შეძენაზე თანხმობას სახელმწიფო კომპანია შესყიდვების სააგენტოსგან ელოდება.

"შესყიდვების კანონის შესაბამისად, გამარტივებული ელექტრონული ტენდერის ან ელექტრონული ტენდერის საშუალებით შეუძლებელია აღნიშნული კონცერტების და მუსიკალური ფესტივალის ჩატარება. ვინაიდან კონტრაქტები უნდა გაფორმდეს მსოფლიოში აღიარებული ვარსკვლავური მუსიკალური ჯგუფების, არტისტების და ელექტრონული მუსიკის შემსრულებლების (DJ) პროვაიდერ სააგენტოებთან", — აღნიშნავენ ბლექ სია არენაში.

კომპანიის პრესსამსახურში On.ge-ს განუცხადეს, რომ იმ დრომდე ვერ დაასახელებენ შემსრულებლების ვინაობას, სანამ მათგან ოფიციალური თანხმობა არ ექნებათ.

ბლექ სი არენა საქართველოს ყოფილი პრემიერმინისტრის ბიძინა ივანიშვილის ფონდმა ქართუმ ააშენა. როგორც კომპანიის წარმომადგენლები ამბობდნენ, საკონცერტო დარბაზის ღირებულება 200 მილიონი ლარია. ივანიშვილმა საკონცერტო დარბაზი სახელმწიფოს 2016 წლის ივლისში აჩუქა. ოპოზიციის ნაწილი ხელისუფლებასა და ივანიშვილს აკრიტიკებდა, რომ მსგავსი საჩუქრის შენახვა ბიუჯეტს მძიმე ტვირთად დააწვებოდა.