ზუგდიდის მეექვსე საჯარო სკოლის ყოფილი დირექტორის, ია კერზაიას შვილი ბაჩანა შენგელია პროკურატურის შეთავაზებას დათანხმდა. ის საგამოძიებო უწყებაში ხვალ, 18 აპრილს 12 საათზე ადვოკატთან ერთად მივა, საგამოძიებო ნაწილის ხელმძღვანელებს შეხვდება და საქმის მასალებს გაეცნობა.

"ის, რომ საზოგადოების მაღალი ინერესის გამო გააკეთეს ეს აბსურდია. რამ განაპირობა ბევრი ვერსია შეიძლება იყოს, მაგრამ ჩვენ ვიყენებთ შესაძლებლობას", — განუცხადა მან On.ge-ს.

მისი თქმით, საქმის მასალების გაცნობასთან ერთად პროკურორთან დასვამს მთავარ კითხვას, რატომ არ დაიკითხა გამოძიების ფარგლებში განათლების მინისტრი.

შენგელია რამდენიმე თვე ითხოვდა დაზარალებულის სტატუსის მინიჭებას იმისთვის, რომ საქმის მასალებზე ქონოდა წვდომა, თუმცა პროკურატურიდან ორჯერ მიიღო უარი. დღეს, 17 აპრილს პროკურატურამ მას უწყებაში მისვლა შესთავაზა.

ია კერზაიას გარდაცვალების საქმე

ზუგდიდის სკოლის დირექტორი, ია კერზაია ინსულტის დიაგნოზით საავადმყოფოში გადაიყვანეს, თუმცა მისი გადარჩენა ვერ მოხერხდა და ის 9 დეკემბერს გარდაიცვალა.

მანამდე ია კერზაია რუსთავი 2-თან ჰყვებოდა, რომ მას შემდეგ რაც არჩევნებში პედაგოგების ჩართვაზე უარი თქვა, ანონიმური წერილის საფუძველზე სკოლაში გენერალური ინსპექციის ორი თანამშრომელი ჩავიდა და სკოლა შეამოწმა. რუსთავი 2-ის ინფორმაციით, შემოწმების დღეს რეგიონს წყალი არ მიეწოდებოდა და სკოლაშიც საპირფარეშოები იყო გაუმართავი. ამ მიზეზის გამო კი თანამდებობიდან დირექტორის გათავისუფლებას აპირებდნენ.

სკოლის დირექტორზე ზეწოლაზე საუბრობენ გარდაცვლილის ოჯახის წევრები და ოპოზიცია. აღნიშნულ საკითხს გამოეხმაურა განათლების, მეცნიერების, კულტურისა და სპორტის მინისტრის მოადგილე ლევან ხარატიშვილი და აღნიშნა, რომ ამ საქმის პოლიტიზირება მიუღებელია.