აჭარის ტელევიზიის 103-მა თანამშრომლემა, განცხადება გაავრცელა, რომლითაც ისინი დირექტორს, ნათია კაპანაძეს ემიჯნებიან. თანამშრომლები ამტკიცებენ, რომ სარედაქციო დამოუკიდებლობა დირექტორის მონაპოვარი არ არის და მას შემდეგ არსებობს, რაც ტელევიზია საზოგადოებრივი მაუწყებელი გახდა.

განცხადებით, თანამშრომლები ემიჯნებიან მაუწყებლის სახელით გავრცელებულ განცხადებას, რომელშიც საუბარია იმაზე, რომ ბორდის წევრების მიერ ნათია კაპანაძის იმპიჩმენტის საკითხის დაყენება სარედაქციო დამოუკიდებლობას უქმნის საფრთხეს. მათი მტკიცებით, კაპანაძე ერთპიროვნულ და არაკომპეტენტურ გადაწყვეტილებებს იღებს, რაც ცუდად ისახება ტელევიზიის საქმიანობასა და იმიჯზე.

"არაპროფესიონალურად მართვის შედეგი მძიმე ტვირთად აწვება მაუწყებელს. ტელევიზიისა და რადიოს თანამშრომლებს აქვთ უამრავი პრეტენზია დირექტორთან სხვადასხვა საკითხთან დაკავშირებით, მათ შორისაა სამართლიანი ანაზღაურების საკითხიც", — წერია განცხადებაში, რომელიც აჭარის ტელევიზიის სამეურვეო საბჭომ საკუთარ ფეისბუქგვერდზე გაავრცელა.

ფოტო: აჭარის ტელევიზიის მრჩეველთა საბჭო

მაუწყებლის საინფორმაციო სამსახურის უფროსის მოადგილემ, მაია მერკველაძემ On.ge-ს განუცხადა, რომ თანამშრომლებმა განცხადება კანცელარიაში შეიტანეს. მისი თქმით, ხელმომწერების სია ნახეს და იმ ნაწილში რისი იდენტიფიცირებაც მოახერხეს ჟურანლისტები არ არიან.

კაპანაძის იმპიჩმენტის მოთხოვნა

ნათია კაპანაძის იმპიჩმენტი მრჩეველთა საბჭოს ორმა წევრმა მოითხოვა. მათ შორისაა ირაკლი დარცმელიძე, რომელიც ნაციონალური მოძრაობის კვოტით არის წარდგენილი და გიგა ჩხარტიშვილი, რომელიც ქართული ოცნების კვოტითაა საბჭოში.

საბჭოს თავმჯდომარემ ნატა იმედაიშვილმა On.ge-ს უთხრა, საბჭოს წევრებს პრეტენზიები აქვთ პრიორიტეტების შეუსრულებლობაზე, ხელფასების პრობლემასა და თანამშრომლის სამსახურიდან გათავისუფლებაზე. მისი თქმით, დოკუმენტს არ გაცნობია და პოზიციას ვერ დააფიქსირებს, თუმცა კაპანაძის დირექტორობის პერიოდში არსებული პრობლემების განხილვისას თავადაც იგივე საკითხებს ასახელებს.

კაპანაძის იმპიჩმენტისთვის გადამწყვეტი იმედაიშვილის ხმაა, რადგან საბჭოს სხვა წევრები ამბობენ, რომ დირექტორის წინააღმდეგ ხმის მიცემას არ აპირებენ.

თავად კაპანაძემ განაცხადა, რომ საფრთხე ექმნება სარედაქციო დამოუკიდებლობას და მაუწყებლის გამართულ მუშაობას. მისი თქმით, მაუწყებელი პრიორიტეტებს იმ შესაძლებლობების ფარგლებში ასრულებს, რაც აქვთ. მისივე თქმით, ტელევიზიის რეიტინგს ფილმები წერდა, თუმცა ფილმები ვერ შეცვლის ქედასა და ხულოში ადამიანების ცხოვრებას.

სარედაქციო დამოუკიდებლობის საფრთხეზე საუბრობს აჭარის ტელევიზიაც. მაუწყებლის გავრცელებულ განცხადებაში აღნიშნულია, რომ მიმდინარე პროცესები უპირისპირდება სარედაქციო დამოუკიდებლობას და მთლიანად საზოგადოებრივი მაუწყებლის იდეას.

კაპანაძის იმპიჩმენტის ინიაციტივად არასამთავრობო ორგანიზაციები მკვეთრად უარყოფითად აფასებენ. ნათია კაპანაძეს მხარი დაუჭირა საქართველოს სახალხო დამცველმაც.

ამავე თემაზე: