აჭარის ტელევიზიის დირექტორმა, ნათია კაპანაძემ მის მიმართ რეიტინგზე გამოთქმულ კრიტიკას უპასუხა და თქვა, რომ ფილმები ვერ შეცვლის ქედასა და ხულოში მცხოვრები ბავშვების, ახალგაზრდების ან სხვადასხვა ასაკის ადამიანების ცხოვრებას. ამის შესახებ მან TV პირველის ეთერში ისაუბრა.

"აჭარის მაუწყებლის რეიტინგი ნამდვილად იდგა მექანიკურ პროდუქციაზე, ფილმებზე. რა თქმა უნდა, ფილმები არის რეიტინგული პროდუქტი... გვინდოდა ფილმების ან დოკუმენტური ფილმების ნაცვლად, რომელიც, რა თქმა უნდა, მნიშვნელოვანი პროდუქტია, გვესაუბრა ხულოში, ქედაში ადამიანების საჭიროებებზე", — ამბობს ნათია კაპანაძე.

ნათია კაპანაძე განმარტავს, რომ აჭარის ტელევიზია დღეს მუშაობს იმ დაგეგმარებით, რაც არის საზოგადოებრივი მაუწყებელი:

"რისკები, რაც შეიძლება მოყვეს ჰოლივუდში გადაღებულ ფილმებს და აჭარაში მიმდინარე პროცესს, იქნება აბსოლუტურად სხვადასხვა.... გვინდოდა, ძალიან ბევრი გვესაუბრა გზების, ჯანდაცვის, განათლების საკითხებზე. ჩვენს ეთერში ბევრი გადაცემა ეთმობა ადამიანების საჭიროებებს. როდესაც ჩვენ საპირწონედ დავდებთ ერთის მხრივ, ფილმებს, რეიტინგს და მეორეს მხრივ, დავდებთ მოწესრიგებული გზის ან განათლების საკითხის ან უკეთესი ჯანდაცვის პირობების შესახებ დისკუსიას, რა თქმა უნდა, გადაწყვეტილება უნდა მივიღოთ, კონკრეტული გაშუქებული საკითხების მიხედვით".

ნათია კაპანაძის იმპიჩმენტის მოთხოვნა

ნათია კაპანაძის იმპიჩმენტი მრჩეველთა საბჭოს ორმა წევრმა მოითხოვა. მათ შორისაა ირაკლი დარცმელიძე, რომელიც ნაციონალური მოძრაობის კვოტით არის წარდგენილი და გიგა ჩხარტიშვილი, რომელიც ქართული ოცნების კვოტითაა საბჭოში.

საბჭოს თავმჯდომარემ ნატა იმედაიშვილმა On.ge-ს უთხრა, საბჭოს წევრებს პრეტენზიები აქვთ პრიორიტეტების შეუსრულებლობაზე, ხელფასების პრობლემასა და თანამშრომლის სამსახურიდან გათავისუფლებაზე. მისი თქმით, დოკუმენტს არ გაცნობია და პოზიციას ვერ დააფიქსირებს, თუმცა კაპანაძის დირექტორობის პერიოდში არსებული პრობლემების განხილვისას თავადაც იგივე საკითხებს ასახელებს.

კაპანაძის იმპიჩმენტის ინიაციტივად არასამთავრობო ორგანიზაციები მკვეთრად უარყოფითად აფასებენ. ნათია კაპანაძეს მხარი დაუჭირა საქართველოს სახალხო დამცველმაც.

ამავე თემაზე: