აჭარის საზოგადოებრივი მაუწყებლის დირექტორმა ნათია კაპანაძემ მის მიმართ გამოთქმულ კრიტიკას უპასუხა და ყურადღება სარედაქციო პოლიტიკასა და საერთაშორისო ანგარიშებში ტელევიზიის შესახებ პოზიტიურ დასკვნებზე გაამახვილა.

კაპანაძის თქმით, ისინი გააგრძელებენ იმ სტანდარტებით მუშაობას, რომელიც საზოგადოებრივ მაუწყებელს სჭირდება.

"ჩვენ ვმუშაობთ საზოგადოებისთვის, ვმუშაობთ იმ სტანდარტებისთვის, რაც საჭიროა ნამდვილი საზოგადოებრივი მაუწყებლისთვის. ჩვენთვის ძალიან მნიშვნელოვანია საზოგადოებრივი მაუწყებლის იდეა და ვმუშაობთ ისე, როგორიც უნდა იყოს ნამდვილი საზოგადოებრივი მაუწყებელი: დამოუკიდებელი, ობიექტური, პოლიტიკური და კომერციული გავლენისგან თავისუფალი და ვფიქრობთ, ამ მუშაობის შედეგი ჩანს აუდიტორიიდან გამომდინარე, შიდა და საერთაშორისო კვლევებით. ჩვენ გვეძვირფასესება ეს პროცესი და ვფიქრობ ამ სტანდარტით გავაგრძელებთ მუშაობას", — განაცხადა ნათია კაპანაძემ.

10 აპრილს საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს ორმა წევრმა, ირაკლი დარცმელიძემ (ნაციონალური მოძრაობის კვოტით) და გიგა ჩხარტიშვილმა (ქართული ოცნების კვოტით) ტელევიზიის დირექტორის, ნათია კაპანაძის იმპიჩმენტი მოითხოვა. საბჭოს თავმჯდომარის, ნატა იმედაიშვილის განცხადებით, საბჭოს წევრების საჩივარი რამდენიმე საკითხს ეხება, მათ შორის პროგრამულ პრიორიტეტებს, ფონდების მიერ დაფინანსებულ გადაცემებს, ხელფასებს და ა.შ. ნათია კაპანაძეს იმ შემთხვევაში გადააყენებენ, თუ იმპიჩმენტს მხარს ბორდის სამი წევრი დაუჭერს.

არასამთავრობო ორგანიზაციები მკვეთრად უარყოფითად აფასებენ საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს ორი წევრის ინიციატივას, ტელევიზიის დირექტორის ნათია კაპანაძის იმპიჩმენტის შესახებ. ნათია კაპანაძეს მხარი დაუჭირა საქართველოს სახალხო დამცველმაც.

ამავე თემაზე: