პარლამენტის თავმჯდომარემ, ირაკლი კობახიძემ დეპუტატ ეკა ბესელიას მიმართვის ფორმა დაუწუნა და მიკროფონი გაუთიშა. ბესელიამ კობახიძეს ჰკითხა, როდის ჩაინიშნებოდა დაპირებული ბიუროს სხდომა და როდის ჩაისმებოდა სასამართლოებთან დაკავშირებით მისი და კიდევ 12 დეპუტატის კანონპროექტი.

ბესელიამ კობახიძეს მიმართა: "ისე იქცევით... ყურადღებით, ერთი წუთით, ყურადღებით, ირაკლი, შენ მოგმართავ, ხომ ხედავ, სადაც ვზივარ? თუ ვერ მხედავ, შემიძლია ახლოს მოვიდე". ამ განცხადების შემდეგ კობახიძემ ბესელიას მიკროფონი გაუთიშა.

"პარლამენტის თავმჯდომარეს ჯერ თქვენობით უნდა მიმართოთ, როგორც პარლამენტის თავმჯდომარე მოგმართავთ თითოეულ თქვენგანს და შემდეგზე, როცა ამ შეცდომას გამოასწორებთ, მოგცემთ ხოლმე სიტყვას", — მიმართა კობახიძემ ბესელიამ.

კობახიძის განცხადების შემდეგ ბესელია მასთან მივიდა და ჰკითხა, "ხომ არ შეეშინდა". კობახიძემ დასახმარებლად მანდატურის სამსახურს მიმართა.

ეკა ბესელია სასამართლოების შესახებ ირაკლი კობახიძის კანონპროექტს იწუნებს. მან უმრავლესობას შესთავაზა, მის მიერ მომზადებული კანონპროექტი მიიღონ, რომელიც ბესელიას თქმით, ვენეციის კომისიის ყველა რეკომენდაციას ითვალისწინებს.