პარლამენტის თავმჯდომარე, ირაკლი კობახიძე ადასტურებს, რომ ზოგიერთი დეპუტატი რეგისტრაციას სხვა პარლამენტარის დახმარებით გადის, კერძოდ მათ ბარათებს სხვა დეპუტატები ატარებენ. როგორც კობახიძე ამბობს, ამ პრაქტიკას ყველა ფრაქციაში მიმართავენ.

პარლამენტის თავმჯდომარემ აღნიშნულ საკითხზე ყურადღება მას შემდეგ გაამახვილა, რაც ნაციონალური მოძრაობის წევრმა, სალომე სამადაშვილმა განაცხადა, რომ ზოგიერთი დეპუტატი კენჭისყრაში სხვის მაგივრად მონაწილეობს და ამის დამადასტურებელი მასალაც აქვთ. ამავე საკითხზე ისაუბრა ევროპული საქართველოს წევრმა, ხათუნა გოგორიშვილმა:

"წინა სხდომაზე მე გავაკეთე განცხადება სხვისი პულტების გამოყენების შესახებ და მოვითხოვე შესაბამისი რეაგირება. მაგრამ თურმე იმიტომ, რომ სხდომის წამყვანმა არ მისცა დავალება საპროცედურო საკითხთა კომიტეტს იმწუთასვე ეს საკითხი არ შეისწავლება. ახლა, როცა გაირკვა, რომ ოპოზიციური ფრაქციის წარმომადგენელიც არის, ახლა შეისწავლება".

კობახიძის თქმით, პრევენციის მიზნით, მომავალი სხდომებიდან მანდატურის სამსახური წარმოადგენს დეპუტატთა სიას, რომელთა ბარათებითაც სხვა დეპუტატებმა ისარგებლეს. მისივე თქმით, დეპუტატების სახელებს არ დაასახელებს, თუმცა რაოდენობას გააჟღერებს.