"დღეისათვის ჩვენი ყველა პრიორიტეტი, რომელიც აქვს აჭარის მაუწყებელს დადგენილი და რა თქმა უნდა, ამ შემთხვევაში ვგულისხმობ მაუწყებლის შესახებ საქართველოს კანონით დაკისრებულ პასუხისმგებლობებს, სრულდება მაუწყებლობების მიერ, იმ შესაძლებლობების ფარგლებში, რაც შეიძლება ქონდეს გუნდს", — ასე უპასუხა აჭარის საზოგადოებრივი მაუწყებლის ტელევიზისა და რადიოს დირექტორმა ნათია კაპანაძემ მრჩეველთა საბჭოს წევრების კრიტიკას, რომლებიც მის იმპიჩმენტს მოითხოვენ.

კაპანაძე ამბობს, რომ მთავარი ამოცანები და გამოწვები, რომელიც გუნდს ქონდა გადაცემებთან დაკავშირებით დაძლეულია. მისივე თქმით, სამუშაო პროცესი გრძელდება.

"დღეისათვის ჩვენს ბადეში თქვენ ნახავთ მყარ ზოლებს, ნახავთ გადაცემებს, რომელიც მორგებულია იმ საჭიროებებზე, რაც აქვთ დღეს აჭარასა და საქართველოში ადამიანებს. ჩვენ მაქსიმალურად ვცდილობთ ვისაუბროთ იმ საჭიროებებზე, რომელიც ირგვლივ აქვთ სტუდენტებს, სკოლის მოსწავლეებს, სხვადასხვა ასაკის ადამიანებს", — განაცხადა კაპანაძემ TV პირველის ეთერში.

კაპანაძემ ისაუბრა რეიტინგის პრობლემაზეც. მან აღნიშნა, რომ ტელევიზიის რეიტინგი იდგა მექანიკურ პროდუქციაზე, ფილმებზე, თუმცა მისი თქმით, ფილმები ვერ შეცვლის ხულოსა და ქედის ადამიანების ცხოვრებას.

კაპანაძის იმპიჩმენტის მოთხოვნა

ნათია კაპანაძის იმპიჩმენტი მრჩეველთა საბჭოს ორმა წევრმა მოითხოვა. მათ შორისაა ირაკლი დარცმელიძე, რომელიც ნაციონალური მოძრაობის კვოტით არის წარდგენილი და გიგა ჩხარტიშვილი, რომელიც ქართული ოცნების კვოტითაა საბჭოში.

საბჭოს თავმჯდომარემ ნატა იმედაიშვილმა On.ge-ს უთხრა, საბჭოს წევრებს პრეტენზიები აქვთ პრიორიტეტების შეუსრულებლობაზე, ხელფასების პრობლემასა და თანამშრომლის სამსახურიდან გათავისუფლებაზე. მისი თქმით, დოკუმენტს არ გაცნობია და პოზიციას ვერ დააფიქსირებს, თუმცა კაპანაძის დირექტორობის პერიოდში არსებული პრობლემების განხილვისას თავადაც იგივე საკითხებს ასახელებს.

კაპანაძის იმპიჩმენტისთვის გადამწყვეტი იმედაიშვილის ხმაა, რადგან საბჭოს სხვა წევრები ამბობენ, რომ დირექტორის წინააღმდეგ ხმის მიცემას არ აპირებენ.

თავად კაპანაძემ განაცხადა, რომ საფრთხე ექმნება სარედაქციო დამოუკიდებლობას და მაუწყებლის გამართულ მუშაობას. სარედაქციო დამოუკიდებლობის საფრთხეზე საუბრობს აჭარის ტელევიზიაც. მაუწყებლის გავრცელებულ განცხადებაში აღნიშნულია, რომ მიმდინარე პროცესები უპირისპირდება სარედაქციო დამოუკიდებლობას და მთლიანად საზოგადოებრივი მაუწყებლის იდეას.

კაპანაძის იმპიჩმენტის ინიაციტივად არასამთავრობო ორგანიზაციები მკვეთრად უარყოფითად აფასებენ. ნათია კაპანაძეს მხარი დაუჭირა საქართველოს სახალხო დამცველმაც.

ამავე თემაზე: