სახელმწიფო უსაფრთხოების სამსახურმა კარატეს ეროვნული ფედერაციის პრეზიდენტი, კახა ბასილაია დიდი ოდენობით თანხის თაღლითურად დაუფლების ბრალდებით სისხლის სამართლის პასუხისგებაში მისცა.

უწყების განცხადებით, 2018 წლის აპრილში კულტურისა და სპორტის სამინისტრომ კარატეს ეროვნული ნაკრების წევრებისათვის ქალაქ სტამბოლში ჩემპიონატზე მონაწილეობისთვის დაფინანსება გამოყო. გამოძიების ინფორმაციით, შეჯიბრში მონაწილეობა ოთხმა სპორტსმენმა მიიღო, თუმცა ბასილაიამ სამინისტროს წარუდგინა დოკუმენტაცია, რომლითაც თითქოსდა ნაკრების ათი დელეგატი იყო გამგზავრებული. მათივე თქმით, პრეზიდენტი თაღლითურად 10 441 ლარს დაეუფლა.

კარატეს ფედერაციის პრეზიდენტს ბრალი წარედგინა სისხლის სამართლის კოდექსის 180-ე მუხლის მე-3 ნაწილის "ა" და "ბ" ქვეპუნქტებით გათვალისწინებული ბრალდება. აღნიშნული მუხლი სასჯელის სახით ექვსიდან 9 წლამდე ვადით თავისუფლების აღკვეთას ითვალისწინებს.