ერთ დღესაც თუ საყვარელ ლეკვს გაჩუქებენ, მაგრამ თქვენი დატვირთული სამუშაო გრაფიკის გამო ვერ გადაწყვეტთ დაიტოვოთ თუ არა, მაშინ ეს ისტორია გაიხსენეთ. ნიკა აბაშიძეს ცოტა ხნის წინ ბიგლი აჩუქეს, რომელიც დატვირთული სამუშაო გრაფიკის გამო, თავისივე კომპანიაში ოფიციალურ პოზიციაზე დაასაქმა.

დღეს ერთ-ერთ ყველაზე პოპულარულ სტარტაპს Caru-ს, რომელსაც უამრავი მომხმარებელი ჰყავს, თანამშრომლების განწყობაზე ზრუნვის დეპერტამენტის უფროსი ჰყავს და ამ თანამდებობას 3 თვის ლეკვი ბიგლუ იკავებს.

"ყოველ დილით, როცა სამსახურში მივდიოდი, ვფიქრობდი სად წამეყვანა ჩემი ახალი ლეკვი. სახლში მარტო ვერ დავტოვებდი, ამიტომ მუდმივად ოფისში დამყავდა. იქ ისე მოშინაურდა, რომ ბოლოს ვიფიქრეთ, ოფიციალურ თანამშრომელად გაგვეფორმებინა", - გვიყვება ნიკა აბაშიძე, Caru-ს დამფუძნებელი.

ლეკვს სახელი მისი ჯიშიდან გამომდინარე შეურჩიეს და კომპანიას შუსაბამეს. ბიგლის ლეკვს ბიგლუ ჰქვია, რაც Caru-სთან იწვევს ასოციაციას.

კომპანიაში ბიგლუს გამოჩენას სოციალურ ქსელში დიდი გამოხმაურება მოჰყვა. მომხმარებლები კომენტარებში საკუთარი ძაღლის ფოტოებს დებდნენ და Caru-ს დამფუძნებლებს სთხოვდნენ, ვაკანსიების გამოჩენის შემთხვევაში მათი ძაღლების კანდიდატურაც განეხილათ. ბიგლუს კოლეგა ძაღლებიც კი გამოუჩნდნენ და დიდი სამეგობრო წრე შეკრეს.

ბიგლუ მუშაობას უკვე შეუდგა და ოფისში მისვლას ყველას ასწრებს.

მას თავისი ფეისბუქის გვერდიც კი აქვს, რომელსაც მომხმარებლებთან კომუნიკაციისთვის იყენებს. ბიგლუმ დღეს თავისი თანამშრომელის მაუსით გართობა გადაწყვიტა და ეს სახალისო ამბავი თავის მეგობრებს ფეისბუქზე მოუყვა.

თანამშრომლების განწყობაზე ზრუნვის დეპარტამენტის უფროსს ოფიციალური ხელფასიც კი აქვს დანიშნული. ის ანაზღაურების სახით დღეში ორჯერ კვებასა და 1-საათიანი სეირნობას იღებს.

ამავე თემაზე: