ამერიკის ყოფილი ვიცე პრეზიდენტი ჯო ბაიდენი ამბობს, რომ ამიერიდან ის სხვა ადამიანების პირად სივრცეს უფრო მეტი სიფრთხილით მოეკიდება. მისი სიტყვები ოთხი ქალის განცხადებას მოჰყვა, რომლებიც ამბობდნენ, რომ ბაიდენმა მათ თავი არაკომფორტულად აგრძნობინა.

ბაიდენმა კრიტიკას ტვიტერზე გამოქვეყნებული 2-წუთიანი ვიდეოთი უპასუხა. მასში ის ბოდიშს არ იხდის, თუმცა აღნიშნავს, რომ გაჟღერებულმა ცნობებმა მის ყურამდე მიაღწია:

"სოციალური ნორმები იცვლება და სტანდარტები მაღლდება. საზღვრები, პირადი სივრცის დაცვაზე, წაიშალა და მე ეს კარგად მესმის. ვიცი, რასაც ამბობენ და ბევრად უფრო დაფიქრებული ვიქნები. ეს ჩემი პასუხისმგებლობაა, რომელსაც ბოლომდე ვიაზრებ. თუმცა, მე მჯერა, რომ მმართველობის დროს, ადამიანებთან ურთიერთობა მნიშვნელოვანია. ეს არ შეიცვლება, მაგრამ უფრო მეტ პატივს ვცემ ადამიანების პირად სივრცეს და ეს კარგი რამაა".

ბაიდენმა აღნიშნა, რომ ის მუდამ ცდილობდა კაცებისა და ქალების წახალისებას და მხარდაჭერის სხვადასხვა ჟესტით გამოხატვას. ის დასძენს, რომ წარსულში ქალების გაძლიერებასა და ძალადობისგან მათ დაცვას მცდელობას არ აკლებდა.

29 მარტს, The New York Magazine-მა გამოაქვეყნა ანგარიში, რომელშიც ნევადის შტატის ყოფილი კანონმდებელი ლუსი ფლორესი ამბობს, რომ ბაიდენმა ის არაკომფორტულ მდგომარეობაში ჩააგდო. მისი სიტყვებით შემთხვევა 2014 წელს, საარჩევნო კამპანიის ღონისძიებაზე მოხდა, როცა მას ბაიდენმა ჯერ თმაზე დასუნა და შემდეგ თავის უკანა მხარეზე აკოცა.

მოგვიანებით ბაიდენი უხერხული ჟესტის გამოვლენაში კიდევ სამმა ქალმა დაადანაშაულა. ერთ-ერთის თქმით, მას ბაიდენმა ცხვირზე ცხვირი გაუხახუნა, ერთის სიტყვებით, გვერდიგვერდ ისხდნენ, როცა ვიცე-პრეზიდენტმა მას ფეხზე ხელი დაადო. 59 წლის მწერლის, დიჯეი ჰილის სიტყვებით, ბაიდენმა მას მხარზე ხელი დაადო და შემდეგ ის ზურგზე ჩააცურა.

ბაიდენის დასაცავად გამოვიდნენ #MeToo-ს მხარდამჭერი ქალები, ალისია მილანო, მეგან მაკკეინი და სხვები.

გავრცელებული მოსაზრებით, ბაიდენის მიმართ აგორებული კრიტიკა უკავშირდება 2020 წლის საპრეზიდენტო არჩევნებს, რომელზეც შესაძლოა მან კანდიდატურა წამოაყენოს. ბაიდენს დემოკრატიული პარტიის სახელით კენჭისყრაზე თავი ჯერ არ წარუდგენია.

კრიტიკის შემდეგ, ტრამპის მხარდამჭერმა კომიტეტმა იუთუბზე ვიდეო გამოაქვეყნა, სახელად "უსიამოვნო ჯო ბაიდენი", რომლის სლოგანიცაა "ჩვენი შვილები გიყურებენ".

პრეზიდენტ დონალდ ტრამპის სიტყვებით, ჯო ბაიდენის წინააღმდეგ დემოკრატიული პარტიის მემარცხენე ნაწილმა გაილაშქრა. "სოციალისტებმა მას კარგად მიხედეს. ის [ბაიდენი] გამოიჭირეს", - დასძინა მან.

წარსულში თავად ტრამპი სექსუალურ შევიწროებაში უამრავმა ქალმა დაადანაშაულა.