გაიცანით თბილისის ზოოპარკის ახალ ტერიტორიაზე მცხოვრები დათვი, სახელად თენგო. მასზე დღეს გავიგეთ, რომ წარმოშობით გორიდან არის, თუმცა საკმაოდ თავისუფლად გრძნობს თავს იქ, სადაც ცხოვრობს.

ვიდეოში, რომელიც დათვების რეაბილიტაციის ფეისბუქისგვერდზე გამოაქვეყნდა, ვხედავთ, რომ ის საჯდომს იფხანს, თუმცა გარშემო მგლები ეხვევიან.

საბოლოოდ, მათი სიახლოვით შეწუხებულმა თენგომ, მგლებს დაუცაცხანა და შემდეგ, თავისი საქმე განაგრძო.

"იჯდა და ელოდებოდა, ვაშლს როდის მივცემდი და ამასობაში ძალიან საქმიანი სახით დაიწყო ფხანვა. ჯერ ამას ვუღებდი, მერე სიცილით ვსკდებოდი და მერე თევზები ვაჩუქე", - წერს თბილისის ზოოპარკის მკვლევარი ხატია ბასილაშვილი ფეისბუქზე.

დათვების რეაბილიტაცია თბილისის ზოოპარკის პროგრამაა იმ ბელებისთვის, რომლებიც დაობლდნენ, ან მოქალაქეებთან უკანონოდ ყოფნის შემდეგ ზოოპარკს მიაბარეს.

მანამ, სანამ ამ პატარა ცხოველებს თქვენს ნიუს ფიდში ხალისი შემოაქვთ, უნდა იცოდეთ, რომ ისინი ამავდროულად ბუნებრივი ქცევის გამოხატვას სწავლობენ. როდესაც მიბარებული ბელი მზად იქნება, მას თბილისის ზოოპარკი ველურ ბუნებაში დააბრუნებს.